महाराष्ट्र राज्य परीक्षा परिषदेतर्फे घेण्यात येणारी ‘महाराष्ट्र शिक्षक पात्रता परीक्षा-२०२६’ (टीईटी) यंदा २८ जून रोजी होणार आहे. राज्यातील तब्बल दोन लाख २६ हजार २६३ शिक्षक ही पात्रता परीक्षा देणार आहेत. सध्या सेवेत असणाऱ्या शिक्षकांसह नियमित परीक्षार्थी अशा एकूण चार लाख २८ हजार १२२ परीक्षार्थींनी टीईटी परीक्षेसाठी नोंदणी केली असून यांनी पेपर एक आणि पेपर दोन मिळून एकूण सहा लाख १२५ अर्ज केले आहेत.

राज्यातील ३७ जिल्हास्तरावर जिल्हा मुख्यालयाच्या ठिकाणी एकूण एक हजार ७२९ परीक्षा केंद्रांवर ही परीक्षा होणार आहे. टीईटी परीक्षेतील ‘पेपर एक’साठी ७०१ केंद्र, तर ‘पेपर दोन’साठी एक हजार २८ केंद्रावर वर्ग खोल्या,प्रवेश, लॉबी, केंद्र संचालक कक्ष असे एकूण १८ हजार ७१७ सीसीटीव्ही कॅमेरे बसविण्यात येणार आहेत.

नाशिक जिल्ह्यात १०१ केंद्रांवर ही परीक्षा होईल. पेपर एक व दोन असे मिळून एकूण ४१ हजार २८० उमेदवार जिल्ह्यात परीक्षा देणार आहेत. परीक्षेचे हॉलतिकीट डाउनलोड करण्याची लिंक बातमीत देण्यात आली आहे. जिल्ह्यात पेपर एकसाठी ३८, पेपर २ साठी ६३ परीक्षा केंद्रे निश्चित केली आहेत. पेपर एकसाठी १६ हजार ९२१ व पेपर दोनसाठी २४ हजार ३५९ उमेदवारांनी नोंदणी केली आहे. परीक्षार्थीनी ओळखपत्रासोबत आधारकार्ड, पॅनकार्ड, वाहनचालक परवाना किंवा मतदान ओळखपत्र बाळगणे आवश्यक आहे.

नावात बदल केले असेल तर राजपत्र अधिसूचना, विवाह नोंदणीपत्र किंवा प्रतिज्ञापत्र सादर करणे बंधनकारक असणार आहे. मेटल डिटेक्टरद्वारे तपासणी, बायोमॅट्रिक नोंदणी आणि फेस रेकगनिशनद्वारे परीक्षागृहात प्रवेश दिला जाईल. सर्व परीक्षा केंद्रांवर 'एआय' आधारित सीसीटीव्ही यंत्रणा राहणार असून, परीक्षा सुरू होण्यापूर्वी दीड तास उमेदवारांना केंद्रावर उपस्थित राहावे लागणार आहे. पेपर एक सकाळी १० ते दुपारी १ आणि पेपर २ दुपारी अडीच ते सायंकाळी ५ यावेळेत होईल. 'टीईटी'च्या नियोजनासाठी जिल्हाधिकारी आयुष प्रसाद यांच्या अध्यक्षतेखाली जिल्हा परीक्षा आयोजन व सनियंत्रण समिती गठीत करण्यात आली आहे.

शिक्षक पात्रता परीक्षा हॉलतिकीट डाउनलोड लिंक- https://mahatet.in/Notices/AdmitCardFinder/SearchAdmitCardDetails