राज्यात विधान परिषदेच्या पदवीधर आणि शिक्षक मतदारसंघाच्या एकूण 5 जागांसाठी मतदान झालं. मात्र, या निवडणुकीत पैसे वाटपाचा आरोप झाल्यानं राजकीय वातावरण तापलं. बारामती पदवीधर आणि शिक्षक मतदारसंघात मतदान प्रक्रियेदरम्यान, अजित पवारांच्या राष्ट्रवादीच्या उपनगराध्यक्षांच्या पती योगेश नाळे यांनी पैसे वाटतानाचा व्हिडीओ समोर आलाय. तर दुसरीकडे, शरद पवारांच्या राष्ट्रवादीच्या खासदार सुप्रिया सुळेंनीही खळबळजनक आरोप केलाय.

भाजपकडून पैसे वाटपासाठी स्पायकॅम पेनचा वापर

पुणे शिक्षक आणि पदवीधर मतदारसंघाच्या निवडणुकीत भाजपकडून पैसे वाटपासाठी स्पायकॅम असलेल्या पेनचा वापर केला जात असल्याच्या तक्रारी समोर येतायत. मतदारांच्या खिशाला असे पेन लावून, भाजपच्या उमेदवाराला मतदान केल्याचा व्हिडिओ रेकॉर्ड करायचा आणि मतदानानंतर तो दाखविल्यावर ठरलेले पैसे द्यायचे, असा प्रकार सुरू असल्याचं मतदार सांगतायत. या तक्रारी अत्यंत गंभीर आणि चिंताजनक आहेत. मतदानाची गोपनीयता आणि मतदारांचे स्वातंत्र्य धोक्यात आणणाऱ्या या प्रकाराची निवडणूक आयोगानं आणि शासनानं तातडीनं दखल घेऊन सखोल चौकशी करावी आणि दोषींवर कठोर कारवाई करावी.

खरंतर, याआधीच नागपूर पदवीधर मतदार यादीत 8 हजार 744 मतदारांची नावे दुबार असल्याचा दावा काँग्रेसनं केला.एवढच नाही तर एकाच मोबाईल क्रमांकाचा वापर करून 30 ते 40 मतदारांची नोंद झाल्याचाही आरोपही काँग्रेसनं केलाय..

हे कमी म्हणून की काय आता ठाकरेसेनेचे खासदार संजय राऊतांनी थेट निवडणुकीचं रेट कार्ड सांगत भाजपवर आरोप केलाय. पुणे शिक्षक मतदारसंघाच्या निवडणुकीत 15 हजार रुपये एका मताला भाव असल्याचा आरोप ओबीसी नेते लक्ष्मण हाकेंनीही केला होता. निवडणूका लागल्या की मतं पैशानं विकत घेण्याचा प्रकार समोर येतो. दुबार मतदार आणि स्पायकॅम पेनचा वापर या आरोपांची निवडणूक आयोगानं सखोल चौकशी करावी, अशी मागणी विरोधकांनी केलीये.

शिक्षक - पदवीधर सारख्या निवडणुकीतही अशा पद्धतीनं मतदानप्रक्रियेचा पुरता फज्जा उडत असेल तर निवडणुकीला काही महत्त्वं उरलंय का?.. हाच खरा सवाल आहे.