Nashik Water Storage: एकीकडे राज्यातील काही भागात पावसाच्या दमदार हजेरीने बळीराजा सुखावलेला असताना काही भागात मात्र अद्याप पावसाने दडी मारली आहे. त्यामुळेच राज्यातील अनेक भागांमध्ये दुष्काळाची छाया गडद होत आहे. नाशिक जिल्ह्यावरही दुष्काळाचे सावट पसरले असून अल्प पावसामुळे नागरिकांची चिंता वाढली आहे.

याबाबत अधिक माहिती अशी की, पावसाने पाठ फिरवल्यामुळे नाशिकरांची (Nashik) चिंता वाढली आहे. नाशिक जिल्ह्यात पावसाच्या सरासरीच्या ३८ टक्के तूट आहे. त्यामुळेच पावसाळा सुरू होऊन २ महिने उलटले तरी अनेक भागात खरिपाच्या पेरण्या रखडल्याचे चित्र दिसत आहे. तसेच पेरण्या झालेली पिकेही पाऊस न पडल्याने करपू लागल्याने शेतकऱ्यांवर दुबार पेरणीचे संकट ओढावले आहे.

पुढील ८ दिवसात समाधानकारक पाऊस न पडल्यास पीके वाळण्याची भिती शेतकऱ्यांमध्ये आहे. दरवर्षी जून, जूलैपर्यंत नाशिकच्या गोदावरीला एक दोनदा पूर येउन जातो यावरून नाशिककरांना पावसाचा अंदाज येतो. परंतू यंदा एकदाही गोदामाई खळाळून वाहिली नाही. त्यामुळेच नाशिककरांवर दुष्काळाचे संकट ओढावण्याची चिन्हे दिसत आहेत.

दरम्यान, एकीकडे पावसाने दडी मारलेली असतानाच कांद्याच्या प्रश्नावरुनही नाशिकचे शेतकरी आक्रमक झाले आहेत. केंद्र सरकारने निर्यातशुल्क वाढवण्याचा निर्णय घेतल्यानंतर शेतकऱ्यांनी कांदा लिलाव बंद पाडला होता.

हा बंद सलग तिसऱ्या दिवशीही सुरू असून निर्यात मूल्य हटवण्याची तसच सीमेवर आणि बंदरात अडकलेल्या कांद्याची निर्यात होत नाही, तोपर्यंत कांदा लिलाव सुरू करणार नाही.. अशी भूमिका शेतकऱ्यांनी वर्तवली आहे. (Latest Marathi News)