महापालिका निवडणुका तोंडावर आहेत. अशात खरी शिवसेना कुणाची? असा प्रश्न पुन्हा एकदा चर्चेला आलाय.. त्याला कारण ठरलयं. 8 ऑक्टोबरला शिवसेना पक्ष आणि चिन्ह या वादावर सर्वोच्च न्यायालयात होणार अंतिम सुनावणी. एकीकडे पंतप्रधान नरेंद्र मोदी मुंबई दौऱ्यावर असताना होणाऱ्या या सुनावणीला विशेष महत्त्व आलयं. त्यामुळे सुनावणीत एकनाथ शिंदे यांचे विमान सर्वोच्च न्यायालय जमिनीवर पाडणार का? हे लवकरच कळेल असा खोचक टोला कायदेतज्ञ्ज्ञ असीम सरोदेंनी लगावलाय.

दुसरीकडे 20 ऑगस्टची सुनावणी लांबल्यानंतर ठाकरे सेनेनं वारंवार अंतिम सुनावणी तातडीनं घेण्याची विनंती केली होती. अशातच आतातरी सर्वोच्च न्याय मिळण्याची अपेक्षा आहे, असं विधान संजय राऊतांनी केलयं. तर धनुष्यबाण आमच्याकडेच राहिल कारण राम आमच्याकडे आहे, असा खोचक टोला शिंदेसेनेच्या गुलाबराव पाटलांनी लगावलाय.

गेल्या 3 वर्षांपासून शिवसेना पक्ष आणि चिन्हाच्या वादाचा खटला सुरु आहे.. अशातच न्यायाधीश सूर्यकांत 8 ऑक्टोबरला होणाऱ्या सुनावणीत नेमका काय निकाल देतात? याकडे दोन्ही पक्षाचं लक्ष लागलयं. मात्र वेगवेगळ्या कारणांनी रखडलेली सुनावणी 8 ऑक्टोबरला तरी होणार का? की इथेही तारीख पे तारीख असंच सुरू राहणार.