शरद पवार राजकारणातील भ्रष्टाचाराचे सुभेदार आहेत, अशी टीका केंद्रीय गृहमंत्री अमित शहा यांनी पुण्यातील भाजपच्या महाअधिवेशनातून केली होती. त्यांच्या या टीकेचा शरद पवार यांनी चांगलाच समाचार घेतला आहे. मला भ्रष्टाचाराचा सुभेदार म्हणणारे स्वतः गुजरातमधून तडीपार झालेले होते, असा टोला शरद पवार यांनी अमित शहांना लगावलाय. ते छत्रपती संभाजीनगर येथे बोलत होते.

राज्यातील ज्येष्ठ नेते शरद पवार (Sharad Pawar) हे सध्या छत्रपती संभाजीनगरच्या दौऱ्यावर आहेत. शुक्रवारी त्यांनी एका पुस्तक प्रकाशन सोहळ्याला हजेरी लावली. यावेळी त्यांनी अमित शहा यांनी केलेल्या टीकेचा चांगलाच समाचार घेतला. उपस्थितांना संबोधित करताना शरद पवार म्हणाले, ८ दिवसांपूर्वी माझ्यावर केंद्रीय गृहमंत्री अमित शहा यांनी टीका केली.

"देशात जेवढे भ्रष्टाचारी आहेत, त्यांचे सरदार शरद पवार आहेत, असं अमित शहा (Amit Shah) यांनी म्हटलं. आश्चर्याची बाब आहे. जेव्हा गुजरात येथे दंगल झाली होती. त्यावेळी कायदा आणि सत्तेचा गैरवापर केला म्हणून सुप्रीम कोर्टाने त्यांनाच तडीपार केलं होतं. तोच माणूस आज आपल्या देशाचा गृहमंत्री आहे, हे दुर्दैव आहे", अशी टीका शरद पवार यांनी केली.

पंतप्रधान नरेंद्र मोदी एकदा बारामतीत आल्यावर म्हणाले होते की, मी शरद पवार यांचे बोट धरून राजकारणात आलो. पण माझा माझ्या बोटावर पूर्ण विश्वास आहे. मी माझं बोट कुणाच्याही हातात देणार नाही, असं म्हणत शरद पवार यांनी पंतप्रधान मोदींनाही चिमटा काढला.

पुढे बोलताना शरद पवार म्हणाले, "लोकसभा निवडणुकीचा प्रचार सुरू असताना संविधान बदलण्यासाठी आम्हाला ४०० जागांची गरज आहे, असं विधान कर्नाटकाच्या एका भाजप नेत्याने केलं होतं. नरेंद्र मोदी यांच्या मंत्रिमंडळातील मंत्र्यांचा देखील हाच सूर होता. मात्र, संविधान वाचवण्यासाठी जनतेने भाजपला चांगलाच धडा शिकवला, याचा मला आनंद आहे. नेहमी सावध राहण्याची गरज आहे".