गेल्या काही दिवसांपासून राज्यातील राजकीय समीकरणांमध्ये वेगानं बदल होतोय. अशातच शरद पवारांची राष्ट्रवादी NDAसोबत जाणार का? अशा चर्चांना पुन्हा उधाण आलंय. आणि त्याला कारण ठरलयं. पवार आणि सुप्रिया सुळेंनी केवळ सहा दिवसांत घेतलेली पंतप्रधान नरेंद्र मोदी आणि अमित शाहाची दोन वेळा घेतलेली भेट. गेल्या काही दिवसात राज्यातील नेत्यांनी NDA प्रणित सरकारमधील प्रमुख नेत्यांच्या भेटीगाठी कशा घेतल्यात,पाहूयात.

7 जुलै 2026

पवारांच्या राष्ट्रवादीचे जयंत पाटील आणि भाजपचे खासदार विनोद तावडे यांच्यात गुप्त बैठक

22 जुलै 2026

जंतरमंतरवर आंदोलन सुरु असताना शरद पवार आणि सुप्रिया सुळेंनी संसदेत पंतप्रधान मोदींची भेट घेतली

भेटीत विद्यार्थी आंदोलनावर चर्चा झाल्याचं पवारांनी सांगितलं

23 जुलै 2026

दिल्लीत पार्थ पवार आणि प्रफुल पटेल यांनी शरद पवार यांची भेट घेतल्याची माहिती समोर

27 जुलै 2026

दादांच्या राष्ट्रवादीचे प्रदेशाध्यक्ष सुनील तटकरे यांनी केंद्रीय गृहमंत्री अमित शाह यांची भेट घेतली

27 जुलै 2026

त्याच दिवशी सुप्रिया सुळेंनीही खासदार बजरंग सोनवणे यांच्यासोबत केंद्रीय गृहमंत्री अमित शाहांची भेट घेतली.

या भेटीगाठीमुळे पवारांची राष्ट्रवादी एनडीएसोबत जाणार असल्याच्या चर्चांना आणखीनच उधाण आलयं. मात्र, भाजप नेतृत्त्वानं एनडीए प्रवेशासाठी दोन्ही राष्ट्रवादी एकत्र येण्याची अट शरद पवारांना घातल्याचं बोललं जातंय. त्यामुळेच दोन्ही राष्ट्रवादीतील नेते भाजपच्या वरिष्ठ नेतृत्वाशी भेटीगाठी करत असल्याचं सूत्रांचं म्हणणंय. मात्र आता स्वत: पवारांनीच दोन्ही राष्ट्रवादी एकत्र येण्याच्या शक्यतांना पूर्णविराम दिलाय.

दिल्लीतील राजकीय भेट-गाठी पाहता डिलिमिटेशन विधेयकासाठी सत्ताधारी राजकीय समीकरणांची जुळवाजुळव करत असल्याचं स्पष्ट दिसतयं. राष्ट्रवादीच्या विलिनीकरणाला पवारांनी स्पष्ट नकार दिल्यानं आता पवारांच्या राष्ट्रवादीबाबत भाजप काय भूमिका घेणार? पवार खरंच मविआ सोडून एनडीएत जाणार का? याबाबत उत्सुकता लागलीय.