विधानसभा निवडणुकीच्या प्रचारसभेदरम्यान राष्ट्रवादी काँग्रेस शरद पवार गटाचे नेते जयंत पाटील यांनी महायुतीचे उमेदवार दत्तात्रय भरणे यांच्याबाबत मोठं वक्तव्य केले आहे. 'भरणे मामासारख्या गद्दाराला पाडण्यासाठी पूर्ण ताकदीने तुम्ही करा.', असे आवाहन जयंत पाटील यांनी इंदापूरमधील जनतेला केले आहे.

हर्षवर्धन पाटील यांच्या प्रचारार्थ आज इंदापूर तालुक्यातील काटी या गावामध्ये जाहीर सभा झाली. या सभेला राष्ट्रवादी काँग्रेस शरद पवार पक्षाचे प्रदेशाध्यक्ष जयंत पाटील यांनी हजेरी लावली. यावेळी जयंत पाटील यांनी आमदार दत्तात्रय भरणे यांच्यावर हल्लाबोल केला. जयंत पाटील यांनी सांगितले की, 'आमदार दत्तात्रय भरणे हे गद्दार आहेत. त्यांना या विधानसभेला पाडा.' असं आवाहन त्यांनी इंदापूरमध्ये केले.

तसंच, 'येत्या २० तारखेला सकाळी ८ वाजल्यापासून सायंकाळी ५ वाजेपर्यंत मतदानाचा मुहूर्त आहे. यात गद्दार भरणे यांना पाडा.' असे आवाहन जयंत पाटील यांनी उपस्थित नागरिकांना केले. या सभेमध्ये जयंत पाटील यांनी दत्तात्रय भरणे यांच्यासोबत उपमुख्यमंत्री अजित पवार यांच्यासह महायुतीवर देखील जोरदार टीका केली.