एकीकडे बंधू राज ठाकरे सोबत आपल्याने आपली ताकद वाढल्याचं उद्धव ठाकरे म्हणत आहेत. दोन्ही बंधूंमध्ये बैठक सत्र सुरू असून राजकीय चर्चा केली जात आहे. त्यावेळी मात्र राज्यातील इतर भागात ठाकरे गटाला धक्क्यांवर धक्के मिळत आहेत. ठाकरे गट फिनिक्स सारखी भरारी घेईल, अशी आशा वर्तवली जात असताना पक्षातील आऊटगोइंग सुरूच आहे. उत्तर महाराष्ट्रात ठाकरे गटाला पुन्हा एक मोठा धक्का बसलाय. मनमाड शहरातील ठाकरे गटाच्या कार्यकर्त्यांनी शिंदे गट शिवसेनेत प्रवेश केलाय.

शहरातील मंगलमूर्ती नगर भागातील ठाकरे गटाचे शिवसेनेचे कट्टर कार्यकर्त्यांनी शिंदे गटात प्रवेश केल्याने शिवसेना ठाकरे गटाची ताकद कमी होत आहे. नगरपालिका निवडणुकीत उमेदवारी मिळावी यासाठी हे पक्षप्रवेश होत असल्याची चर्चा दबक्या आवाजात होऊ लागली आहे. नगर पालिका निवडणुकीचे वारे वाहू लागले आहे. या निवडणुकीच्या वाऱ्यात अनेक राजकीय पक्षांना कार्यकर्ते सोडून जाण्याचे धक्के बसत असतात. यात महाविकास आघाडीला सर्वाधिक धक्के बसले आहेत.