तबरेज शेख

Maharashtra Politics

राज्यात लोकसभेच्या ४५ पेक्षा अधिक जागा निवडून आणण्यासाठी महायुती कामाला लागली असून मिशन 45+ अंतर्गत नाशिकमध्ये बैठक होत आहे. नाशिक आणि दिंडोरी लोकसभा मतदारसंघासंदर्भात चर्चा करण्यासाठी ही बैठक होत आहे. या बैठकीला भाजप, शिवसेना ( शिंदे गट ), राष्ट्रवादीच्या ( अजित पवार गट ) प्रमुख नेत्यांनी उपस्थिती लावली आहे. शिवसेनेचे उत्तर महाराष्ट्र संपर्क प्रमुख भाऊसाहेब चौधरी, खासदार गोडसे, भाजप आमदार फरांदे, राष्ट्रवादी शहर जिल्हाध्यक्ष तसंच प्रमुख पदाधिकारी बैठकीला उपस्थित आहेत. स्थानिक पातळीवर तीनही पक्षाची एकत्रित बैठक होण्याची ही पहिलीच वेळ आहे.

२०२४ मध्ये होणाऱ्या लोकसभा निवडणुकासाठी भाजपसह महायुतीतील पक्ष कामाला लागताना दिसत आहेत. भाजप यावेळी लोकसभेसाठी शिवसेना (शिंदे गट) आणि राष्ट्रवादीला सोबत घेऊन निवडणूक लढण्याची शक्यता आहे. काही दिवसांपूर्वी भाजपचे प्रदेशाध्यक्ष चंद्रशेखर बावनकुळे यांनी महायुती ४५ पेक्षा अधिक जागा जिंकेल असा दावा केला होता. त्यादृष्टीने मोर्चेबांधणी सुरू केली असून बावनकुळे महाविजय २०२४ संकल्प यात्रेंतर्गत राज्याचा दौरा करत आहेत. त्याच पार्श्वभूमीवर जागावाटपासाठीही चर्चा सुरू असून नाशिक आणि दिंडोरी लोकसभा मतदारसंघासंदर्भात चर्चा करण्यासाठी आज नाशिकमध्ये बैठक होत असून या बैठकीकडे महाराष्ट्राचं लक्ष लागलं आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)