रश्मी पुराणिक

Political News: शिवसेना ठाकरे गटाला पुन्हा एकदा मोठा धक्का बसला आहे. ठाकरे गटाला लागलेली गळती आमदार, खासदारांपासून आता कर्मचाऱ्यांपर्यंत पोहचली आहे. शिवसेना भवनातील काही कर्मचाऱ्यांनी ठाकरे गटाची साथ सोडसल्याची माहिती समोर आली आहे. ठाकरे गटाकडे पाठ फिरवत कर्मचाऱ्यांनी शिंदे गटात प्रवेश केला आहे. (Latest Marathi News)

मिळालेल्या अधिक माहितीनुसार, आमदार, खासदारांनी ठाकरेंना रामराम केल्यानंतर आता शिवसेना भवनातील कर्मचाऱ्यांचीही भर पडली आहे. शिवसेना उद्धव ठाकरे गटासाठी शिवसेना भवनात काम करणाऱ्या ४ कर्मचाऱ्यांनी मुख्यमंत्री एकनाथ शिंदे यांच्या उपस्थितीत शिंदे गटात प्रवेश केला आहे.

कर्मचारी कोणते कामकाज पाहायचे?

ठाकरे गटाकडे पाठ फिरवलेले चारही कर्मचारी लोगो, डिझाईनिंग तसेच सभेतील क्रिएटिव्ह अशी कामे पाहत होते. यासह इथल्या कॉल सेंटरमध्ये सातजण काम करत होते. यातील अमोल मटकर, अमित शिगवण यांच्यासह चौघांनी शिंदे गटात प्रवेश केला आहे.

आगामी लोकसभा निवडणुकांसाठी सर्वच पक्ष कामाला लागलेत. पक्षांतर्गत वरिष्ठांकडून भेटीगाठी घेतल्या जात आहेत. शिवसेनेतील शिंदे आणि ठाकरे गटांच्या देखील बैठका होत आहेत. अशात आतापर्यंत नेते मंडळी पक्ष बदलत होते. मात्र आता ठाकरे गटाच्या कर्मचाऱ्यांनी देखील शिंदे गटात प्रवेश केला आहे.