Maharashtra Weather Update : पुढील ४ दिवस पावसाची शक्यता कमीच असल्याचा अंदाज हवामान विभागाने वर्तवला आहे. पण मंगळवारपासून मान्सूनच्या पुढील प्रवासासाठी पोषक हवामान तयार होईल. त्यानंतर १ जुलैपर्यंत मान्सून संपूर्ण महाराष्ट्र व्यापेल असा अंदाज हवामान विभागाने वर्तवला आहे. आज राज्यात उष्णतेच्या लाटेचा इशारा देण्यात आला आहे. तर पूर्व विदर्भात वादळी पावसाची शक्यता आहे. (Maharashtra monsoon arrival latest update)

८ जूनपासून रखडलेला मॉन्सूनचा प्रवास पुढील आठवड्यात मंगळवारपासून पुन्हा सुरू होण्याची शक्यता आहे. त्यानंतर, १ जुलैपर्यंत मॉन्सून संपूर्ण महाराष्ट्र व्यापेल आणि पावसासाठी अनुकूल हवामान तयार होईल. मात्र, या काळात कोकण वगळता राज्यातील इतर भागांमध्ये पाऊस सरासरीपेक्षा कमीच राहील, असा अंदाज IMD वर्तविला आहे.

आज कुठे कुठे पाऊस कोसळणार?

कोकण, मध्य महाराष्ट्र, विदर्भात आज उष्ण व दमट हवामानाची शक्यता आहे. यवतमाळ, नागपूर, भंडारा, गोंदिया आणि गडचिरोली जिल्ह्यांत पावसाचा अंदाज वर्तवण्यत आला आहे. उर्वरित राज्यात ढगाळ हवामानासह उन्हाचा चटका जाणवेल असा अंदाज हवामान विभागाने वर्तवला आहे. तर तुरळक ठिकाणी पावसाची शक्यता कायम आहे.

महाराष्ट्रात लवकरच आगमनाचा अंदाज

मॉन्सूनच्या पुढील वाटचालीसाठी आता पोषक हवामान तयार होत आहे. सोमवारी (ता. १५) मॉन्सूनने संपूर्ण आंध्र प्रदेशसह तेलंगणा, ओडिशा, पश्चिम बंगाल, बिहार आणि झारखंड राज्याच्या आणखी काही भागांत प्रगती केली आहे. त्यानंतर शुक्रवारी (ता. १९) मॉन्सूनची वाटचाल काहीशी संथ म्हणजेच 'जैसे थे' होती. मात्र, आगामी मंगळवारपर्यंत (ता. २३) महाराष्ट्रासह तेलंगणा, ओडिशा, झारखंड, बिहारचा उर्वरित भाग, तसेच छत्तीसगडच्या काही भागांत मॉन्सून दाखल होण्याची शक्यता कायम असल्याचे भारतीय हवामान विभागाने म्हटले आहे.

उष्ण व दमट हवामानाची शक्यता (येलो अलर्ट) :

पालघर, ठाणे, मुंबई, रायगड, रत्नागिरी, नाशिक, अहिल्यानगर, अकोला, वर्धा, चंद्रपूर.

वादळी पावसाचा इशारा (येलो अलर्ट) :

यवतमाळ, नागपूर, भंडारा, गोंदिया, गडचिरोली.

उन्हाचा चटका कायम असलेली ठिकाणे :

ब्रह्मपुरी ४२.३, मालेगाव ४१, अकोला ४१, वर्धा ४१.