मावळमध्ये राजकीय समिकरणे वेगानं बदलत आहेत. बंडखोरी केलेल्या राष्ट्रवादी काँग्रेस अजित पवार पक्षाच्या बापू भेगडेंना शरद पवारांच्या पक्षानेही पाठिंबा जाहीर केलाय. त्यामुळे अपक्ष लढणाऱ्या बापू भेगडे यांची ताकत वाढली आहे.

पुण्यातील मावळात गेल्या काही दिवसांपासुन राजकीय हाय व्होल्टेज ड्रामा पहायला मिळत आहे. अजित पवारांनी विद्यमान आमदार सुनील शेळकेंना उमेदवारी जाहीर करताच महायुतीत मोठा बॉम्ब फुटला. भाजपचे माजी राज्यमंत्री बाळा भेगडेंसह मावळमधील सर्व पदाधिकाऱ्यांनी राजीनामे दिलेत. बंडखोरी केलेल्या राष्ट्रवादी काँग्रेस अजित पवार पक्षाच्या बापू भेगडेंना पाठिंबा जाहीर केलाय. विशेष म्हणजे बापू भेगडे यांना राष्ट्रवादी काँग्रेस शरद पवार पक्षानेही जाहीर पाठिंबा दिला आहे. त्यामुळे बापू भेगडे यांची ताकत वाढली आहे.

अजित पवारांच्या पक्षाकडून उमेदवारी न मिळाल्याने खूप दुःख झालं आहे. त्यामुळे अपक्ष निवडणूक लढवतोय, असं बापू भेगडेंनी जाहीर केलंय. दुसरीकडे मावळमध्ये भाजपला आणखी एक धक्का बसलाय. बाळासाहेब नेवाळे यांनी प्रदेश सहकार आघाडी सहसंयोजक पदाचा राजीनामा दिलाय. बाळासाहेब नेवाळे हे दूध संघाचे अध्यक्षही होते. मावळमध्ये महायुतीमध्ये बिघाडी झाली आहे. मावळमध्ये बंडखोर विजयाचा झेंडा फडकावणार का? याकडे सर्वांचं लक्ष आहे.