अनेक गावात बिबट्यांची दहशत वाढताना पाहायला मिळत असताना कोल्हापुरातून मोठी बातमी समोर आली आहे. भरदिवसा कोल्हापुरातील मध्यवर्ती भागात एका बिबट्याने दहशत माजवली असून नागाळा पार्क इथे एम एस ई बी कार्यालयाच्या पिछाडीस बिबट्याने एका तरुणासह पोलिसांवर देखील हल्ला केला. या हल्ल्यात तरुण आणि पोलिस जखमी असल्याचे वृत्त आहे.

राज्यातील अनेक जिल्ह्यांमध्ये बिबट्याने दहशत माजवली आहे. मागील आठवड्यात एका शेतकऱ्याच्या चिमुकल्या मुलीचा बिबट्याच्या हल्ल्यात दुर्दैवी मृत्यू झाला. या घटनेनंतर गावकरी संतापले होते. अशातच कोल्हापुरातील मध्यवर्ती ठिकाणी ताराबाई पार्क परिसरातील एम एस ई बी कार्यालय परिसरात बिबट्या शिरला. या बिबट्याने परिसरात धुमाकूळ घातला.

बिबट्याला रेस्क्यू करण्यासाठी वन विभागासह पोलीस देखील घटनास्थळी दाखल झाले आहेत. बिबट्याला रेस्क्यू करताना एका तरुणासह ऑन ड्युटी असलेल्या पोलिसावर देखील त्याने हल्ला केला. या घटनेनंतर परिसरात खळबळ उडाली आहे. गेले अनेक तासांपासून या बिबट्याला जेरबंद करण्यासाठी वनविभाग प्रयत्न करत आहे.

बिबट्याला जेरबंद करण्यासाठी वनविभागाने सापळा आणला असून लवकरच धुमाकूळ घालणाऱ्या बिबट्याला जेरबंद करण्यात येणार आहे. यासाठी वनविभाग आणि पोलीस कर्मचारी घटनास्थळी बिबट्याचा मागोवा घेत आहे. दरम्यान राज्यातील जिल्ह्यांमध्ये लहान मुलांपासून ते मोठ्यांपर्यंत अनेकजण बिबट्याचे शिकार झाले आहेत. अन्नाच्या शोधात असलेले हे प्राणी मानवी वस्तीत शिरून आपलं भक्ष शोधत असल्याने या घडामोडी घडत आहे. वनविभागाने लवकरात लवकर कारवाई करावी अशी ग्रामस्थांकडून अपेक्षा व्यक्त केली जात आहे.