राज्याच्या राजकारणातुन मोठी बातमी समोर आली आहे. लक्ष्मण हाके हे आज पंढरपूर दौऱ्यावर आहेत. अशातच शाब्दिक वादावादीतून लक्ष्मण हाके आणि मराठा क्रांती मोर्चाचे कार्यकर्ते आमने सामने भिडले. याघटनेत पोलिसांनी वेळीच हस्तक्षेप केल्याने मोठा अनर्थ टाळाला.

लक्ष्मण हाके आज पंढरपूरच्या दौऱ्यावर आहेत. या दौऱ्यादरम्यान मराठा क्रांती मोर्चाच्या कार्यकर्त्यांनी घोषणाबाजी केली. "एक मराठा लाख मराठा, जरांगे पाटील आगे बढो" अशी घोषणाबाजी केली. यानंतर मराठा क्रांती मोर्चाचे राज्य समन्वय धनाजी साखळकर आणि लक्ष्मण हाके यांच्यामध्ये शाब्दीक वादावादी झाली.

हा वाद टोकाला गेल्याने लक्ष्मण हाके आणि मराठा क्रांती मोर्चा चे कार्यकर्ते एकमेकांच्या अंगावर धावून गेले. यादरम्यान वाद चिघळल्याने तुफान मारामारी झाली. प्रसंगाचं गांभीर्य पाहून लक्ष्मण हाके यांनी पोलिसांना बोलावून घेतले. पोलिसांनी वेळीच हस्तक्षेप केल्याने मोठा अनर्थ टळाला.

हाके यांचा जरांगे पाटलांना टोला

धनंजय मुंडे यांच्यावर मनोज जरांगे यांनी आजच्या पत्रकार परिषदेत आरोप केल्यानंतर ओबीसी नेते लक्ष्मण हाके यांनी जरांगे यांची चौकशी करण्याची मागणी केली आहे. लक्ष्मण हाके म्हणाले, "जरांगे यांनी उपस्थित केलेल्या मुद्दे आणि आरोपांवर गृह विभाग तपास करेल. धनंजय मुंडे असे काही करतील असे वाटत नाही. जरांगे यांनी मिडिया ट्रायल बंद करावी. " असा टोला हाके यांनी लगावला

जरंगेंच्या हत्येच्या कटाबाबत काय म्हणाले साखळकर?

दरम्यान सामाजिक क्षेत्रात काम करणारे मराठा आंदोलक मनोज जरांगे पाटील यांच्या हत्येचा कट रचल्याची गंभीर बाब उघडकीस आली आहे. यानंतर मराठा समाज आक्रमक झाला आहे. यामागचा मास्टर माईंड लवकरात लवकर शोधून काढावा अन्यथा मराठा समाज राज्यात तांडव केल्याशिवाय राहणार नाही असा इशारा समाजाच्या कार्यकर्त्यांनी दिला. शिवाय प्रसंगी महाराष्ट्र देखील बंद करू असा इशारा मराठा क्रांती मोर्चाचे राज्य समन्वयक धनाजी साखळकर यांनी दिला आहे.