गणेश कवडे, मुंबई

Government Scheme Scam Update in Marathi: माझी लाडकी बहीण योजना विविध कारणांनी सतत चर्चेत आहे. या योजनेसाठी लाखो महिलांनी अर्ज केला आहे. काही व्यक्तींकडून यामध्ये घोटाळे देखील केले जात आहेत. यामुळे योजनांचा लाभ खऱ्या गरीब आणि गरजू महिलांना मिळत नाहीये. अनेक महिला या योजनेपासून वंचित राहिल्या आहेत.

लाडकी बहीण योजनेत होणाऱ्या घोटाळ्यांबाबत अशीच आणखी एक घटना उघडकीस आलीये. मुख्यमंत्री लाडकी बहीण योजनेत एका व्यक्तीने ३८ अर्ज भरलेत. ⁠वेगवेगळ्या नावाने हे अर्ज भरले गेलेत आणि पैसे देखील काढण्यात आले आहेत. अशी माहिती महिला व बालविकास मंत्री आदिती तटकरे यांनी दिली आहे.

माध्यमांशी संवाद साधताना त्यांनी पुढे सांगितले की, संबंधित बँकांना आदेश देऊन पैसे परत मिळवण्याचे आदेश दिले आहेत. तसेच ते अकाऊंट देखील सिल करण्यात येणार आहेत. ⁠त्या खात्यांशी कोणतेही शासकीय व्यवहार केले जाणार नाहीत. ⁠१५-२० दिवसांत सर्व व्हेरीफिकेशन केले जाणार आहे.

या प्रकरणी चौकशीत ज्या नागरिकांचे आधारकार्ड त्यांच्यावर कारवाई केली जाणार आहे. प्राथमिक चौकशीत असं समजलं आहे की, ते अकाऊंट महिलांचे नाहीयेत त्यामुळे याबाबत अधिक तपास सुरू आहे, असंही आदिती तटकरे यांनी यावेळी सांगितलं आहे.

रविवारपासून महिलांना तिसऱ्या हप्त्याचे पैसे वितरीत केले जात आहेत. मात्र यातही काही महिलांना पैसे आलेत तर काहींना अद्याप पैसे मिळाले नाहीत. यावर आदिती तटकरे यांनी पुढे म्हटलं की, पहिल्या दोन महिन्यात अर्ज केले होते त्यांना २५ तारखेपासून पैसे दिले जात आहेत.