Kolhapur Crime News : कोल्हापूर जिल्ह्यातून एक भयंकर घटना समोर आली आहे. कोल्हापुरातील (Kolhapur) कागल इथं चारित्र्याच्या संशयावरून पतीनेच आपल्या पत्नीसह दोन मुलांची निघृणपणे हत्या केली. पत्नी आणि मुलांची हत्या (Crime) केल्यानंतर पती स्वत: पोलीस ठाण्यात हजर झाला. या घटनेमुळे कागल शहरात खळबळ उडाली असून पोलिसांनी आरोपी पतीला ताब्यात घेतलं आहे. (Kolhapur Kagal News Today)

प्रकाश धोंडीराम माळी असं आरोपीचं नाव आहे. तर पत्नी गायत्री प्रकाश माळी, मुलगी अदिती माळी आणि मुलगा कृष्णा माळी अशी मृतांची नावे आहेत. प्राप्त माहितीनुसार, आरोपी प्रकाश माळी याला आपली पत्नी गायत्रीच्या चारित्र्यावर संशय होता. त्यामुळे आरोपी प्रकाश आणि पत्नी गायत्री यांच्यात कोणत्या ना कोणत्या कारणावरून वाद सुरू होता.

मंगळवारी दुपारी दोन वाजता पत्नी गायत्री फोनवर बोलत असताना त्यांचा वाद झाला. हा वाद इतका विकोपाला गेला की प्रकाश याने पत्नी गायत्रीचा गळा आवळून खून केला. सायंकाळी 5 वाजेच्या सुमारास प्रकाश याचा आठवीत शिकणारा मुलगा कृष्णा घरी आला. प्रकाश याने कृष्णाचाही गळा आवळून खून केला. (Kagal Crime News Today)

इतकंच नाही तर आरोपी प्रकाश याने रात्री 8 वाजेच्या सुमारास अकरावीत शिकणारी मुलगी आदितीचाही गळा आवळला. त्यानंतर रात्री उशीरा आरोपी प्रकाश कागल पोलिस ठाण्यात हजर झाला. पत्नीच्या चारित्र्याच्या संशयावरून आपण तिघांचाही खून केल्याची कबूली प्रकाशने पोलिसांना दिली.

घटनेची माहिती मिळताच पोलीस तातडीने घटनास्थळी दाखल झाले. तिघांचेही मृतदेह ताब्यात घेऊन शवविच्छेदनासाठी पाठवण्यात आले आहेत. चारित्र्याच्या संशयावरून पतीनेच आपल्या पत्नीसह दोन मुलांची हत्या केल्याने कागल शहरात मोठी खळबळ उडाली आहे. पोलिसांनी आरोपी पतीला ताब्यात घेतलं असून पुढील घटनेचा तपास सुरू केला आहे.

Edited By - Satish Daud