लातूर - जिल्ह्यातील उदगीर (Udgir) तालुक्यातील हंडरगुळी येथील गणेश पांडुरंग दापके हा तरुण 31 जानेवारी पासून बेपत्ता होता. सदरील तरुण बेपत्ता असल्याची तक्रार वाढवणा पोलीस (Police) ठाण्यात देण्यात आली होती. या तक्रारीच्या अनुषंगाने वाढवणा पोलीस तपास करीत होते. पोलिसांचा तपास सुरू असताना सदरील तरुणाचा मृतदेह तिरु प्रकल्पाच्या पाण्यात आढळून आला.

हे देखील पहा -

मयत गणेश पांडुरंग दापके यांचा विजय शिवाजी हंगरगे, बालाजी शिवाजी हंगरगे, सुभाष गोविंद हंगरगे, संतोष गोविंद हंगरगे, त्र्यंबक दिगंबर घोगरे आणि अन्य एक व्यक्ती यांनी जुन्या भांडणाचे कुरापत काढून जीवे मारण्याच्या उद्देशाने अपहरण करून खून केला. खुनाचा पुरावा नाहीसा करण्याच्या हेतूने गणेश पांडुरंग दापके यांचा मृतदेह तिरु प्रकल्पाच्या पाण्यात नेऊन टाकला अशी फिर्याद पांडुरंग बाजीराव दापके यांनी दिली.

या प्रकरणी वाढवणा पोलीस ठाण्यात सहा जणांवर रात्री उशिरा खुनाचा गुन्हा दाखल करण्यात आला असल्याची माहिती वाढवणा पोलीस स्टेशनचे सहाय्यक पोलीस निरीक्षक नौशाद पठाण यांनी दिली.