Karnataka Bagalkot News: कर्नाटक सरकारच्या मुजोरीचा आणखी एक धक्कादायक प्रकार समोर आला आहे. कर्नाटकच्या बागलकोट चौकातील छत्रपती शिवाजी महाराजांचा पुतळा हटवल्याचा संतापजनक प्रकार समोर आला आहे. या घटनेने स्थानिकांमधून सरकारविरोधात संताप व्यक्त केला जात आहे.

याबाबत अधिक माहिती अशी की, कर्नाटकमधील बागलकोट चौकात छत्रपती शिवरायांचा पुतळा बसवण्यात आला होता. हा पुतळा कर्नाटक सरकारकडून रातोरात हटवण्यात आल्याचा धक्कादायक प्रकार समोर आला आहे. कर्नाटक सरकारने अर्ध्या रात्रीत कडक पोलीस बंदोबस्तात जेसीबीच्या साहाय्याने हा पुतळा हटवला.

या प्रकाराने स्थानिक शिवप्रेमींमध्ये संतापाची लाट उसळली आहे. भाजप नेते नितेश राणे यांनीही याबद्दल आक्रमक भूमिका घेत 'शिवाजी महाराजांचा पुतळा तातडीने बसवा अन्यथा कॉंग्रेस नेत्यांना महाराष्ट्रात फिरू देणार नाही...' असा इशारा कर्नाटक सरकारला दिला आहे.

तसेच भाजपचे प्रदेशाध्यक्ष चंद्रशेखर बावनकुळे यांनीही या कारवाईचा निषेध केला आहे. "छत्रपती शिवाजी महाराजांचा पुतळा मध्यरात्री हटवला आहे. हा संपूर्ण हिंदुस्थान आणि कोट्यवधी शिवभक्तांचा अपमान आहे. कर्नाटकातील काँग्रेसची ही मुजोरी आम्ही सहन करणार नाही.. असे चंद्रशेखर बावनकुळे म्हणाले.

"महापुरुषांचा सातत्यानं अपमान करणं हे काँग्रेसचं धोरण झालं आहे. कर्नाटक सरकारनं छत्रपती शिवाजी महाराजांचा पुतळा सन्मानानं स्थापित करावा अन्यथा काँग्रेसला त्याचे गंभीर परिणाम भोगावे लागतील.. असा इशाराही त्यांनी दिला आहे. Latest Marathi News)