अभिजीत देशमुख

कल्याण : शितल म्हात्रे व्हिडियो प्रकरणात दहिसर पोलिसांनी कल्याण (Kalyan News) तिसगाव परिसरातून विनायक डायरे या तरुणाला ताब्यात घेतले. विनायक डायरे हा उद्धव बाळासाहेब ठाकरे पक्षाच्या सोशल मीडिया सेल कार्यकर्ता आहे. त्यानंतर सायंकाळच्या सुमारास विनायक डायरे याच्या घरी शिंदे गटाच्‍या (Shiv Sena) शिवसेनेचे तीन कार्यकर्ते आले व त्यांनी विनायक डायरे व त्याच्या कुटुंबाला जिवे ठार मारण्याची धमकी दिल्याचा आरोप डायरे यांच्या कुटुंबाने केला. (Maharashtra News)

डायरे कुटुंबाने याबाबत आज कोळशेवाडी पोलीस ठाण्यात धमकी देणाऱ्या विरोधात तक्रार देण्यासाठी कोळशेवाडी पोलीस ठाण्यात धाव घेतली. यावेळी धमकी देणाऱ्यांची नावे सांगत तक्रार नोंदवण्याचा प्रयत्न केला. मात्र नाव सांगून पण पोलीस अज्ञाता विरोधात तक्रार घेत असल्याचा आरोप डायरे कुटुंबांनी केला आहे.

ठाकरे गटातील कार्यकर्त्यांचा ठिय्या

या विरोधात मध्यरात्रीच्या सुमारास उद्धव बाळासाहेब ठाकरे पक्षाच्या कार्यकर्त्यांनी कोळशेवाडी पोलीस (Police) ठाण्यात ठाण मांडून ठिय्या आंदोलन करत घोषणाबाजी केली. घरात घुसून धमकावणाऱ्या कार्यकर्त्यांविरोधात गुन्हा दाखल करण्याची मागणी उद्धव बाळासाहेब ठाकरे पक्षाच्या कार्यकर्ते पदाधिकाऱ्यांनी केली.