अभिजित देशमुख 
कल्याण : सूचनांचे पालन न करणाऱ्या व कामात हलगर्जीपणा करणाऱ्या ठेकेदारांवर दंडात्मक कारवाई करणार असल्याचा (Kalyan) सज्जड दम महापालिका आयुक्त भाऊसाहेब दांगडे यांनी दिला. खड्डे भरण्याच्या कामांची आज महापालिका आयुक्त दांगडे यांनी पाहणी केली. या पाहणी दौरा दरम्यान ठेकेदारांना (KDMC) वेळेत काम पूर्ण करण्याची ताकीद दिली. यावेळी दुर्गाडी किल्ला परिसरात खड्डे भरणाऱ्या कर्मचाऱ्यांच्या जॅकेटवर केडीएमसीचा लोगो न आढळल्याने आयुक्तांनी संबंधित ठेकेदाराला ५० हजाराचा दंड ठोठावला. (Latest Marathi News)

यंदाच्या पावसाळ्यात कल्याण- डोंबिवली महापालिका क्षेत्रात रस्त्यांवर पडलेला खड्ड्यामुळे महापालिकेवर चारी बाजूंनी टीका झाली. गेल्या दोन दिवसांपासून पावसाने उघडीप दिल्यानंतर महापालिकेकडून खड्डे भरण्याच्या कामाला सुरुवात झाली. आज महापालिका आयुक्तांनी या कामांचा पाहणी दौरा केला. या पाहणी दौऱ्या दरम्यान आयुक्तांनी ठेकेदारांना खड्डे भरण्याचे काम वेळेत पूर्ण करण्याची ताकीद दिली. तसेच खड्डे भरण्याच्या कामासंदर्भात ठेकेदाराला करण्यात आलेला सूचनांचे त्यांनी तंतोतंत पालन करावे; अन्यथा ठेकेदारावर दंडात्मक कारवाई येईल असा इशारा देखील यावेळी महापालिका आयुक्तांनी दिला. 

महापालिका क्षेत्रामध्ये एमएसआरडीसी, एमएमआरडीए, पीडब्ल्यूडी विभागाअंतर्गत असलेल्या रस्त्याबाबत संबंधित अधिकाऱ्यांची बैठक घेतली असून या बैठकीत त्यांना रस्ते दुरुस्ती करण्याचे आदेश दिल्याचे देखील आयुक्तानी सांगितले. अनेकदा पाईपलाईन टाकण्यासाठी व विविध वाहिन्या टाकण्यासाठी विविध यंत्रनांकडून रस्ते खोदले जातात. ही कामे एकाच वेळेस होतील या दृष्टिकोनातून या कामाचे नियोजन शहर अभियंता विभागाने करावा असा सूचना देण्यात आल्याचे आयुक्त दांगडे यांनी सांगितले.