अभिजित देशमुख 

कल्याण : कल्याण पूर्व पिसवली परिसरात चार घुसखोर बांगलादेशी राहत असल्याची माहिती बॉर्डर सेक्युरिटी फोर्सने डोंबिवली मानपाडा पोलिसांना दिली होती. या माहितीच्या आधारे मानपाडा पोलिसांनी शोध सुरू करत चार जणांना ताब्यात घेतले आहे. 

कल्याण (Kalyan News) पूर्वमधील पिसवली येथे एका चाळीत राहणाऱ्या चार बांगलादेशी नागरिकांना पोलिसांनी अटक केली. या मध्ये दोन महिला व दोन पुरुषांचा समावेश आहे. लकी शेख, मोहम्मद शाबीर हुसेन, रुकसाना शेख, तौफिर शेख असे ताब्यात घेतलेल्या चार जणांची नाव आहेत. अटक करण्यात आलेल्या पैकी माेहम्मद शाबीर शेख हा बांगलादेशातून भारतात येत असताना त्याला सिमा सुरक्षा सैनिकांनी अटक केली होती. काही दिवसांनी तो पुन्हा बेकायदेशीरपणे लपून भारतात आला. त्याच्या अटकेची नोंद बीएसएफ जवानांकडे होती. तो पुन्हा भारतात आला असल्याच्या संशयावरुन बीएसएफ जवानांनी डोंबिवली (Manpada Police) मानपाडा पोलिसाना सूचना केली. 

परिसरात करायचे मोलमजुरी 

मोहम्मद हा मार्च २०२४ मध्ये डोंबिवलीत आला होता. गेल्या आठ महिन्यापासून तो त्याच्या नातेवाईकांसह पिसवली परिसरात राहत होता. पोलिसांना बीएसएफने दिलेल्या माहितीनुसार वरिष्ठ पोलिस निरिक्षक विजय कादबाने आणि पोलिस निरिक्षक राम चोपडे यांच्या पथकाने पिसवली गाठली. पोलिसांनी पिसवली परिसरात राहणाऱ्या मोहम्मद शाबीर शेख याच्यासह अन्य तीन जणांना अटक केली आहे. अटक करण्यात आलेले चौघेही कल्याणमध्ये मोलमजूरी करुन राहत होते.