अभिजित देशमुख 
कल्याण : कसारा- सीएसएमटी लोकलमध्ये रात्रीच्या सुमारास आसनगाव रेल्वे स्थानकावर २० लाख रोकड असलेली बॅग आढळून आली. एका प्रवाशाला ही बेवारस बॅग आढळल्याने त्याने याबाबत कल्याण रेल्वे पोलिसांना माहिती देत ही बॅग कल्याण रेल्वे पोलिसांच्या ताब्यात दिली .कल्याण रेल्वे पोलिसांनी बॅग कोणाची आहे याचा तपास सुरू केला आहे

कसारा- सीएसएमटी लोकल ट्रेन २२ सप्टेंबरला रात्री दहा वाजण्याच्या (Kalyan) सुमारास आसनगाव रेल्वे स्टेशन येथून मुंबईच्या दिशेने रवाना झाली. या दरम्यान लोकलमध्ये प्रवास करणाऱ्या एका प्रवाशाला एक बॅग बेवारस पडलेली आढळून आली. त्याने तत्काळ याबाबत कल्याण रेल्वे पोलिसांना (Railway Police) माहिती दिली. रेल्वे पोलिसांनी बॅग उघडून पाहिले असता या बॅगेत तब्बल वीस लाखांची रोकड होती. इतक्या मोठ्या प्रमाणात रोकड आढळून आल्याने खळबळ उडाली आहे. 

पोलिसांकडून तपास सुरु 

कल्याण रेल्वे पोलिसांनी सदरची बॅग ताब्यात घेत सुरवातीला बॅग कोणाची याची विचारणा केली. मात्र कोणाकडूनही प्रतिसाद न मिळाल्याने बॅग जप्त केली आहे. दरम्यान सदरची बॅग कुणाची आहे, कोण विसरले याचा शोध आता पोलिसांनी सुरू केला आहे.