अभिजित देशमुख

कल्याण : कल्याणमधील भाजप पदाधिकारी हेमंत परांजपे यांच्यावर दोन दिवसांपूर्वी हल्ला झाल्याची घटना घडली होती. या प्रकरणात पोलिसात तक्रार दाखल झाल्यानंतर पोलिसांकडून घटनेचा तपास सुरु करण्यात आला होता, यानंतर बाजारपेठ पोलिसांनी दोन जणांना ताब्यात घेतले आहे. तर यातील आणखी तीन जण फरार असून त्यांचा शोध अद्याप सुरु आहे. 

बाजारपेठ पोलिसांनी ताब्यात घेतलेल्यांमध्ये संदीप महाले आणि सूरज भालेराव यांचा समावेश आहे. दोन दिवसापूर्वी कल्याण पश्चिमेतील पारनाका परिसरात भाजप पदाधिकारी हेमंत परांजपे यांच्यावर दोन ते तीन जणांनी प्राणघातक हल्ला केला होता. हल्ल्याची हि घटना सीसीटीव्ही कॅमेरात कैद झाली होती. या हल्ल्यात हेमंत परांजपे हे गंभीर जखमी झाले होते. त्यांना उपचारासाठी रुग्णालयात दाखल करण्यात आले होते. 

सीसीटीव्ही फुटेजवरून शोध 

कल्याणच्या बाजारपेठ पोलिसांनी सीसीटीव्हीच्या सहाय्याने तपास सुरु केला होता. यात दिसणाऱ्या दोन तरुणांना पोलिसांनी अटक केली आहे. संदीप महाले आणि सूरज भालेराव अशी या तरुणांची नावे आहे. हल्ला झाला त्या दिवशी परांजपे लग्न समारंभात झालेल्या वादातून परांजपे यांच्यावर हल्ला झाल्याची प्राथमिक माहिती आहे. हल्ला प्रकरणात आणखीन तीन जणांचा पोलिस शोध घेत आहेत. 

हल्ला झाल्याचे कारण अस्पष्ट 

दरम्यान पोलिसांनी दोघांना ताब्यात घेतले असले तरी भाजप पदाधिकारी परांजपे यांच्यावर हल्ला का केला? कुणाच्या सांगण्यावरून हा हल्ला केला? हल्ल्याच्या मागील मुख्य सूत्रधार कोण आहे? याचा तपास बाजारपेठ पोलीस करत आहेत. एका लग्न समारंभात परांजपे यांच्यासोबत झालेल्या वादातून हा हल्ला झाल्याची प्राथमिक माहिती आहे. ताब्यातील दोघांकडून याबाबत चौकशी सुरु आहे.