मराठा आंदोलक मनोज जरांगेंचे सहकारी आता चौकशीच्या फेऱ्यात अडकले आहेत. जालना जिल्ह्यातील अंबड तालुक्यात अवैध वाळू उत्खनन प्रकरणात मोठी कारवाई करण्यात आलीये. जरांगेंच्या आंदोलनाच्या कोअर कमिटीतील सदस्य संजय नानासाहेब कटारेंना मोठा धक्का बसलाय. कटारेंना 4 कोटी 90 लाख 72 हजार 200 रुपयांच्या दंड ठोठावण्यात आलाय.

एव्हंढच नव्हे तर दंड कायम करून वसुलीच्या निर्देशांसह तत्कालीन तहसीलदारांवर शिस्तभंगाच्या कारवाईचा प्रस्तावही मांडण्यात आलाय. विशेष म्हणजे, जरांगेंचे जुने सहकारी अजय बारस्करांनी याआधीच जरांगेंवर आणि त्यांच्या सहकाऱ्यांवर गंभीर आरोप केलेत. संजय कटारेंच्या वाळूचोरीच्या गुन्ह्यात जरांगेही सहभागी असल्याचा गंभीर आरोप बारस्करांनी केलाय. मात्र, माझ्याविरोधात मोठं षड्यंत्र करण्याचा प्रयत्न असला तरी मागे हटणार नसल्याचा इशारा जरांगेंनी सरकारला दिलाय

विशेष म्हणजे, जरांगेंनी सरकारला 3 महिन्यांचा अल्टिमेटम दिला असला तरी सहकाऱ्यांवरील कंत्राट आणि वाळू चोरीच्या आरोपांमुळे जरांगेंच्या अडचणी वाढण्याची शक्यता आहे. कारण यामुळे आरक्षणाच्या लढाईला वेगळं वळण मिळण्याची शक्यता आहे. त्यामुळे पुढच्या काळात जरांगेंच्या आणखी किती सहकाऱ्यांची प्रकरणं बाहेर येणार आणि त्यामुळे जरांगे आणि सरकारमधला संघर्ष वाढणार की कमी होणार याकडे सर्वांचं लक्ष लागलंय.