अक्षय गवळी 
जालना : माजी केंद्रीय मंत्री रावसाहेब दानवे यांचे पुत्र आमदार असलेल्या जालन्यातील भोकरदन मतदारसंघात महाविकास आघाडीमध्ये रस्सीखेच सुरु असल्याचे पाहण्यास मिळत आहे. कारण भोकरदन विधानसभा मतदारसंघावर शिवसेना ठाकरे गटाने दावा ठोकला आहे.  

जालन्याच्या भोकरदन (Bhokardan) मतदारसंघ जा पारंपारिक राष्ट्रवादी शरद पवार गटाचा असून आता येणाऱ्या विधानसभा निवडणुकीत शिवसेना उद्धव ठाकरे गटाकडून उपजिल्हा प्रमुख रमेश गव्हाड यांच्याकडून या जागेवर दावा करण्यात आला आहे. त्यामुळे येणाऱ्या विधानसभा निवडणुकीत भोकरदन मतदारसंघांमध्ये भाजप विरुद्ध शिवसेना उबाठा यांच्यामध्ये देखील लढत होण्याची शक्यता निर्माण झाली आहे. मात्र (Mahavikas Aaghadi) महाविकास आघाडीच्या जागा वाटपानंतर प्रत्यक्ष चित्र स्पष्ट होणार आहे. 

जागा निवडून आणण्याचा दावा 

मागील दोन विधानसभा निवडणुकीमध्ये आमदार संतोष दानवे यांना राष्ट्रवादी शरद पवार गटानेच आव्हान दिलं होते. मात्र या विधानसभा निवडणुकीमध्ये शिवसेना ही जागा निवडून आणू शकते, असं म्हणत शिवसेनेचे उपजिल्हा प्रमुख रमेश गव्हाड यांनी आता या जागेवर दावा सांगितला आहे. पक्ष नेतृत्वाने कामाला लागण्याचे आदेश दिल्याचे देखील त्यांचं म्हणणं आहे.