जालना : जालना जिल्ह्यातील घनसांगी तालुक्यातील तीर्थपुरी गावात सुरू असलेल्या बनावट खात्याचा गोरख धंदा उघड करण्यास (Jalna News) राज्य मुख्य गुणवत्ता अधीक्षक कार्यालयाच्या पथकाला यश आले आहे. तीर्थपुरी गावातील शहागड रोड परिसरात असलेल्या प्राथमिक आरोग्य केंद्राच्या पाठीमागे पथकाने धाड टाकून पत्र्याच्या सेडमध्ये सुरु असलेला हा गोरख धंदा उघड केल्याने जिल्ह्यात एकच खळबळ उडाली. (Live Marathi News)

पुण्यातील राज्य मुख्य गुणवत्ता अधिक्षक कार्यालयाला जालन्यातील तीर्थपुरी गावात बनावट रासायनिक खताचा गोरख धंदा सुरू असल्याची माहिती मिळाली होती. या माहितीच्या आधारे गुणवत्ता अधीक्षक कार्यालयाच्या पथकाने शहागड रोडवर असलेल्या प्राथमिक केंद्राच्या पाठीमागे असलेल्या पत्राच्या शेडमध्ये धाड टाकली. येथे हलक्या दर्जाचा (Fertilizer) खताचा वापर करून ते मिश्र करून त्यापासून नामांकित कंपन्याच्या नावाने हुबेहूब खत तयार करून कंपन्यांच्या ब्रँड असलेल्या गोण्यामध्ये ते भरून पॅकिंग करत मार्केटमध्ये विक्रीसाठी पाठवल्या जात असल्याची धक्कादायक बाब समोर आली आहे.

पाचशेहून अधिक गोण्याचा साठा जप्‍त

बोबडे यांच्या शेतात गोदामात हा बोगस खताचा कारखाना गेल्या अनेक दिवसांपासून सुरू असल्याची माहिती समोर आली आहे. पथकाने या धाडीत जवळपास नामांकित कंपन्यांच्या विविध ब्रँडच्या रिकाम्या गोण्यासह पाचशेपेक्षा अधिक बोगस खतांनी भरलेल्या गोण्याचा साठा व त्यासाठी लागणारे पॅकिंग साहित्य जप्त केले आहे. रात्री उशिरापर्यंत सुरू असलेल्या कारवाईत आणखी मोठा साठाही मिळण्याची शक्यता वर्तवली जात आहे. बनावट खतांचे रॅकेट राज्यभर असल्याची शक्यता या पथकाकडून वर्तविली जातं असून आतापर्यंत या ठिकाणाहून कुठं कुठं बोगस खाताचा पुरवठा केला गेला. याचाही तपास हे पथक करत आहे. तर घटनेची माहिती मिळताच जिल्हा कृषी अधिकारी यांच्यासह तालुका कृषी विभागाचे अधिकारी ही घटनास्थळी दाखल झाले.