अक्षय शिंदे 
जालना : वाढदिवस साजरा करताना तलवारीने केक कापण्यात आला. जालन्यामध्ये हा प्रकार समोर आला असून या प्रकरणी पोलिसांनी दोघांना जेरबंद केले आहे. जालना स्थानिक गुन्हे शाखेच्या पथकाने ही कारवाई केली. 

जित नंदकिशोर मेहरा आणि रोहित संतोष जाधव असे (Police) पोलिसांनी ताब्यात घेण्यात आलेल्या दोन तरुणांची नावं आहेत. जित मेहरा याचा वाढदिवस होता. यामुळे मित्रांकडून वाढदिवस साजरा करण्याचे नियोजन करण्यात आले होते. जुना (Jalna) जालना भागातील बालाजी मंदीर येथे रस्त्यावर जीत मेहरा हा वाढदिवस तलवारीने केक कापुन साजरा करत आहे; अशी माहिती गुन्हे शाखेच्या पथकाला मिळाली होती. त्या माहितीवरून पोलिसांनी जित मेहरा यास ताब्यात घेतले. 

घरातून तलवार केली जप्त 

दरम्यान सदर वाढदिवसाचा केक कापण्यासाठी वापरलेल्या तलवारीबाबत पोलिसांनी विचारणा केली असता त्याने ती तलवार रोहित संतोष जाधव या तरुणाकडून आणल्याचे सांगितलं. त्यानुसार पोलिसांनी रोहित जाधव यास ताब्यात घेतले. तसेच त्याच्या राहत्या घरातून २ हजार ५०० रुपये किंमतीची धारदार तलवार जप्त केली. या प्रकरणी कदिम जालना पोलिस ठाण्यात गुन्हा दाखल करण्यात आला असून अधिक तपास पोलीस करीत आहेत.