Jalna News Today: जालना शहरातून एक धक्कादायक घटना समोर आली आहे. रेल्वे स्टेशनजवळ असलेल्या उड्डाण पुलाखाली एक तरुण आपला जीव देण्यासाठी थेट रेल्वे ट्रॅकवर उभा राहिला. त्याचवेळी समोरून भरधाव वेगात ट्रेन येत होती. दरम्यान, लोको पायलटला रुळावर तरुण उभा असल्याचं दिसताच त्याने दोन ते तीन वेळा हॉर्न वाजवले.

मात्र, तरी सुद्धा हा तरुण रेल्वे ट्रॅकवरून (Railway track) बाजूला होत नसल्याने अखेर लोको पायलटने ट्रेन थांबवली. ट्रेन थांबवताच या तरुणाने येऊ दे... येऊ दे... असं म्हणत आरडाओरड सुरू केली. बराच वेळ होऊन सुद्धा तरुण रुळावरून बाजूला होत नसल्याने कंटाळून लोको पायलट खाली उतरला.

त्याने या तरुणाची समजूत काढत त्याला बाजूला जाण्याची विनंती केली. अखेर तरुण रुळावरून बाजूला झाला. हा संपूर्ण प्रकार परिसरातील एका व्यक्तीने आपल्या मोबाईल कॅमेऱ्यात कैद केला आहे. या घटनेचा व्हिडीओ सध्या व्हायरल (Viral Video) होत आहे.

दरम्यान, रेल्वे पोलिसांना घटनेची माहिती मिळताच पोलिस घटनास्थळी दाखल झाले. मात्र, तोपर्यंत हा तरुण घटनास्थळावरून निघून गेल्याने त्याची माहिती मिळू शकली नाही. सध्या मोबाईल व्हिडीओच्या आधारे रेल्वे पोलिस या तरुणाचा शोध घेत आहेत. या घटनेनं मोठी खळबळ उडाली आहे.

Edited by - Satish Daud