जळगाव : कामानिमित्त नाशिकला असलेल्या आईला घेऊन मुलगा गावाकडे निघाला होता. मात्र गावी येण्यापूर्वीच आईच्या डोळ्यादेखत मुलाचा मृत्यू झाल्याची दुर्दैवी घटना घडली. जळगाव ते भुसावळ दरम्यान रेल्वेतून पडल्याने घरातील कमावत्या एकुलत्या एक मुलाचा मृत्यू झाल्याने आई आणि दोन बहिणींचा आधार गेला आहे. सदर घटना ६ जूनला जळगाव तालुक्यातील तरसोदजवळच्या रेल्वेरूळाजवळ घडली.

रावेर तालुक्यातील निंभोरा येथील आनंद अशोक रजाने (वय ३३) असे मृत तरुणाचे नाव आहे. आई व दोन बहिणीसह तो वास्तव्यास होता. हातमजुरी करून कुटुंबाचा उदरनिर्वाह सुरू होता. आनंदची आई सखुबाई नाशिक येथे उदरनिर्वाहासाठी गेल्या होत्या. मात्र, नाशिकला नको, आपल्या गावाकडेच काम करू, असे म्हणून आनंद याने आईला घरी आणण्याचा निर्णय घेतला. त्यानुसार ६ जूनला दुपारी गीतांजली एक्स्प्रेसने दोघेजण नाशिकहून भुसावळ जाण्यासाठी निघाले.

बाथरूमला गेला अन दरवाजातून कोसळला 

दरम्यान जळगाव स्थानक सोडल्यानंतर आनंद बाथरूमला गेला. याचवेळी अचानक कोणीतरी गाडीतून पडला, म्हणून लोकांनी आवाज दिला. हे ऐकून आई सखुबाई या दरवाजाकडे आल्या असताना त्यांना मुलगा आनंद रेल्वेतून पडल्याचे समजले. यावेळी सखुबाई यांनी एकच आक्रोश केला. रेल्वेतील प्रवाशांनी त्यांना धीर देऊन भुसावळ स्थानकावरून जळगाव येथे जाण्यासाठी सांगितले. सखुबाई जळगावला पोहोचल्या व त्यांनी मुलगा आनंद असल्याची माहिती पोलिसांना दिली. 

घराचा आधार गेला 

मुलगा मृत झाल्याची माहिती मिळताच आईने एकच आक्रोश केला. तर घरी भाऊ आणि आईची वाट पाहणाऱ्या बहिणींना देखील मोठा धक्का बसला आहे. आनंदच्या मृत्यूने घरातील एकुलता एक मुलगा आणि कमावता एकट्या पुरुषाच्या मृत्यूने घराचा आधारच गेला आहे. या घटनेमुळे पोलिसही स्तब्ध झाले होते. मृतदेह शासकीय वैद्यकीय महाविद्यालय व रुग्णालयात नेण्यात आला.