यावल (जळगाव) : मालोद (ता.यावल) येथील ईमाम दगडु तडवी यांच्या घराची मातीची भिंत कोसळली. यात घरात खेळत असलेल्‍या आबीद तडवी (वय ४) हा दबला गेला. गावातील नागरीकांनी कोसळलेल्या भिंतीच्या ढीगाऱ्यातून चिमुकल्‍याला बाहेर काढले मात्र त्‍याचा जागीच मृत्‍यू झाला होता. (jalgaon-news-wall-collapsed-in-the-pouring-rain-Four-year-old-child-dies)

जळगाव जिल्‍ह्यातील अनेक भागात सकाळपासून रिमझिम पाऊस सुरू आहे. आदिवासी परिसर असलेल्‍या मालोद या गावात सकाळी दुर्घटना घडली. मातीचे घर असल्‍याने पावसाचे पाण्याने भिंत ओली होवून पाणी त्‍यात मुरले होते. यामुळे कोणाला काही समजण्याच्‍या आधीच अचानक भिंत कोसळली.

निष्‍पाप चिमुकल्‍याचा जीव गेला

बाहेर पाऊस सुरू असल्‍याने चिमुकला आबीद घरातच खेळत होता. अचानक भिंत पडल्‍याने चिमुकल्‍याचा खेळतानचा आवाज अचानक दबला गेला. त्‍याला बाहेर काढेपर्यंत श्‍वास गुदमरल्‍याने त्‍याचा मृत्‍यू झालेला होता. मालोद येथील तलाठी तेमरसिंग बारेला यांनी तात्काळ घटनास्थळी जावुन पंचनामा केला. मृत बालकाच्या मृतदेहाचे शवविच्छेदन यावल ग्रामीण रुग्णालयात वैद्यकीय अधिकारी डॉ. शुभम तिळके यांनी केले. वडील इमाम तडवी यांनी खबर दिल्याने यावल पोलीसात अकस्मात मृत्युची नोंद करण्यात आली.