जळगाव : गावातील तरुणांना वाचनाची आवड निर्माण व्हावी, स्पर्धा परीक्षेच्या माध्यमातून अधिकारी वर्ग घडावे, सुशिक्षित पिढी घडावी असे आदर्श विचार समोर ठेऊन भडगाव (Bhadgaon) तालुक्यातील वडगाव नालबंदी येथील माजी सरपंच, सामाजिक कार्यकर्ते मोरसिंग राठोड यांनी त्यांच्या राहत्या घरातच सार्वजनिक वाचनालय (public library) व ग्रंथालय सुरू केले आहे. (jalgaon-news-vadgaon-village-started-a-public-library-in-his-own-house)

संत दगाबापू सार्वजनिक वाचनालय या नावाने वाचनालय सुरू करण्यात आले आहे. गावातील सार्वजनिक यात्रोत्सवानिमित्त ९ डिसेंबरला काँग्रेसचे जिल्हाध्यक्ष प्रदीप पवार यांच्या हस्ते वाचनालयाचे उद्‌घाटन करण्यात आले. यावेळी भैय्यासाहेब पाटील, नागराज पाटील, लोककला अभ्यासक कल्पतेश देशमुख, तंटामुक्ती अध्यक्ष रफीयोद्दीन शेख, सरपंच लिलाबाई राठोड, ग्रामपंचायत सदस्य लक्ष्मण राठोड, भगवान निकुंभ, दिलीप शेंडे आदींसह ग्रामस्थ उपस्थित होते. लोककला अभ्यासक कल्पतेश देशमुख यांनी पुस्तकांचा संच भेट दिला. तर भैय्यासाहेब पाटील यांनी पुस्तके उपलब्ध करून देण्याचे आश्वासन दिले.

विविध ठिकाणाहून पुस्‍तके केली गोळा

मोरसिंग राठोड यांनी सुरू केलेल्या या स्तुत्य उपक्रमाचे सर्वत्र कौतुक होत आहे. स्वतःच्या खर्चातून तसेच विविध राजकिय, सामाजिक क्षेत्रात कार्यरत असलेल्या नेत्यांकडून त्यांनी पुस्तके गोळा केलेली असून अभ्यासासाठी उपलब्ध केलेली आहे. गावातील तरुणांनी वाचनालयाचा उपयोग करावा असे आवाहन मोरसिंग राठोड यांनी केले आहे.