जळगाव : राज्‍य परिवहन महामंडळातील कर्मचारी गेल्‍या तीन महिन्‍यांपासून संपावर आहेत. संपातील कर्मचाऱ्यांवर निलंबनाची कारवाई करण्यात येत असून, त्यानंतर बडतर्फीचीही कारवाई करण्यात येत आहे. यात जळगाव (Jalgaon) जिल्‍ह्यातील तब्बल ३१ कर्मचाऱ्यांवर बडतर्फीची कारवाई करण्यात आली आहे. (jalgaon news st strike news 31 ST employees service stop from Jalgaon district)

राज्‍य परिवहन महामंडळाचे (MSRTC) विलिनीकरणाच्या मागणीसाठी एसटी कर्मचाऱ्यांनी संप (St Strike) पुकारला आहे. या संपाला तीन महिने पूर्ण होत आहेत. संपावर तोडगा काढत महामंडळाने वेतनवाढ दिली. परंतु वेतनवाढ मान्‍य नसल्‍याचे सांगत कर्मचारी विलीनीकरणाच्या मागणीवर ठाम आहेत. यामुळे महामंडळाची ८० टक्के सेवा बंद आहे. बससेवा (St Bus) बंद असल्‍याने महामंडळाचे कोट्यवधींचे नुकसान होत आहेत.

आतापर्यंत ४०० कर्मचारी निलंबित

महामंडळाने संपातील कर्मचाऱ्यांवर निलंबनासह बडतर्फीची कारवाई सुरू केली आहे. सुरुवातीला निलंबन करून नंतर बडतर्फीची कारवाई करण्यात येत आहे. ३१ कर्मचाऱ्यांवर करण्यात आलेल्या कारवाईत चाळीसगाव (Chalisgaon) आगाराचे सर्वाधिक १६, यावलचे आठ तर चोपड्याचे ७ कर्मचारी आहेत. दरम्यान बडतर्फीसोबत आतापर्यंत ४०१ कर्मचाऱ्यांवर निलंबन तर जळगाव विभागातील १७२ कर्मचाऱ्यांवर बडतर्फीची कारवाई करण्यात आली महामंडळातर्फे सांगण्यात आले.