रावेर (जळगाव) : पाच दिवसांच्या ‘नकोशी’चा अज्ञात मातेने त्याग करून तिला कर्जोद शिवारातील शेतात बेवारस सोडून दिले. ही घटना ५ जानेवारीला दुपारी उघडकीस आली. याबाबत येथील पोलिस (Police) ठाण्यात नोंद करण्यात आली आहे. (jalgaon news raver Leaving a newborn baby in a road)

कर्जोद (ता. रावेर) (Raver) येथील पोलिसपाटील अमोल पाटील यांना बुधवारी दुपारी तीनपूर्वी कर्जोद- अहिरवाडी रस्त्यावर मनोज पाठक यांच्या शेताजवळ एका अर्भकाच्या रडण्याचा आवाज ऐकू आला. त्यांनी शेताकडे धाव घेतली असता, एक स्त्रीलिंगी अर्भक (Newborn Baby) आढळले. त्यांनी या अर्भकास पोलिसांच्या माध्यमातून येथील ग्रामीण रुग्णालयात दाखल केले आहे.

बाहेरगावाहून येत रस्‍त्‍यावर टाकले

पोलिसांनी तपास केला असता या नवजात बालिकेची माता परिसरात नसल्याचे प्राथमिक तपासात निष्पन्न झाले आहे. अन्य बाहेरगावाहून अज्ञात व्यक्तींनी नवजात बालिकेला निर्जन रस्त्यावर आणून सोडले असल्याचा प्राथमिक अंदाज आहे. तिच्या मातेचा शोध पोलिसांकडून घेतला जात असून, थंडीच्या दिवसात या पाच दिवसांच्या कोवळ्या बालिकेचा त्याग करणाऱ्या मातेबद्दल तीव्र संताप व्यक्त करण्यात येत आहे.