चाळीसगाव (जळगाव) : चाळीसगाव तालुक्‍यात पावसाने हाहाकार माजवला आहे. महिनाभरात पाचव्‍यांदा पुराचा वेढा पडल्‍याने चाळीसगाव शहरासह परिसरातील जनजीवन विस्‍कळीत झाले आहे. यातच मंगळवारच्‍या मुसळधार पावसामुळे सर्वच नद्यांना पुर आला असून, आज सकाळी तरूण शेतात जात असतांना डोंगरी नदीत वाहून गेल्‍याची घटना घडली. सदर तरूणाचा शोध घेणे सुरू आहे. (jalgaon-news-Incidents-in-Chalisgaon-taluka-dongari-tanda-young-man-swam-in-the-dongari-river)

चाळीसगाव तालुक्यातील गोरखपूर तांडा येथील सोमनाथ रामजी राठोड (वय २५) हा तरूण सकाळी शेतात गेला. दरम्‍यान तो गावालगत असलेल्या डोंगरी नदीच्या पात्रात वाहून गेल्याची घटना आज (२९ सप्टेंबर) सकाळी आठच्या सुमारास उघडकीस आली आहे. या घटनेने परिसरातून हळहळ व्यक्त होत आहे.

अजूनही बेपत्‍ता

दरम्यान सदर घटनेची माहिती मिळताच चाळीसगाव ग्रामीण पोलीसांनी घटनास्थळी धाव घेतली आहे. सोमनाथ राठोड या तरूणाचा तपास ग्रामस्थांकडून सुरू आहे. मात्र त्याचा थांग कुठेच लागलेला नाही. बेपत्ता झालेल्या तरूणासाठी शोध मोहीम सुरू आहेत.