जळगाव : मिटवून टाका वगैरे असा मी बोललो नाही. मला त्रास देणं सुरू असले तरी मी सर्व विषयांना टक्कर देणार. मिटवायचे कोणते राहिले; सर्वच तर सुरू आहे. ईडी, सीबीआय, अँटी करप्शन सर्व ठिकाणी त्रास देणे सुरू असताना मिटवायचे तरी काय? असा पलटवार (Eknath Khadse) एकनाथ खडसे यांनी गिरीश महाजनांच्‍या (Girish Mahajan) वक्तव्यावर लगावला आहे. (Jalgaon Eknath Khadse News)

अमित शहा, फडणवीसांची भेट घेणार

गिरीश महाजन यांनी रक्षा खडसेंनी (Raksha Khadse) आपल्याला सांगितल्याचे म्हटले. मात्र अशी कुठलीही चर्चा रक्षा खडसेसोबत केली नाही. पुढच्या आठवड्यात देवेंद्र फडणवीस (Devendra Fadnavis) यांची भेट घेणार होतो. मात्र ते फॉरेनला गेल्याने व त्यानंतर गणेशोत्सव, नवरात्रोत्सव असल्याने भेट झाली नाही. पुढील काळात शरद पवार (Sharad Pawar) यांच्या समवेत अमित शहा व देवेंद्र फडणवीस यांची भेट घेणार असल्‍याचे देखील खडसेंनी स्‍पष्‍ट केले. भेटीमध्ये राजकीय विषय नाही. मात्र भेटीचे कारण सांगणे खडसेंनी टाळले.

मी ५० खोके घेणारा माणूस नाही

अमित शहा यांची भेट घेण्यासंदर्भात शरद पवार यांना कल्‍पना दिली होती. भेट होवू न शकल्‍याने आता अमित शहा यांची भेट घेणार असून त्‍यावेळी शरद पवार हे देखील सोबत राहणार आहेत. शरद पवार माझ्यासोबत असल्यामुळे अफवांवर विश्वास ठेवू नये मी पन्नास खोके घेऊन जाणारा माणूस नाही; असेही खडसेंनी स्‍पष्‍ट केले.