जळगाव : माजी मुख्‍यमंत्री उद्धव ठाकरे यांची पाचोरा (Pachora) येथे आज सभा होत असून या सभेपुर्वी वातावरण चांगलेच तापलेले पहावयास मिळत आहे. सभेत घुसून दाखवा असे आव्‍हान दिल्‍यानंतर गुलाबराव पाटील (Gulabrao Patil) यांचे समर्थक त्‍यांचा मुखवटा घालून पाचोरा येथे रवाना झाले आहेत. (Tajya Batmya)

माजी मुख्यमंत्री आणि ठाकरे गटाचे प्रमुख उद्धव ठाकरे जळगाव (Jalgaon) जिल्हा दौऱ्यावर असून आज (२३ एप्रिल) त्‍यांची जळगाव जिल्ह्यातील पाचोरा येथे विराट सभा होणार आहे. या सभेपुर्वी संजय राऊतांनी या सभेत चौकटीत राहून बोलावे, अन्यथा सभेत घुसणार. असं थेट आव्हान शिंदे गटाचे मंत्री गुलाबराव पाटील यांनी दिले होते. यावरून संजय राऊत यांनीही प्रत्युत्तर देत सभेत घुसून दाखवा असे आव्‍हान दिले आहे. यानंतर गुलाबराव पाटील यांच्‍या समर्थकांनी गुलाबराव पाटील यांचा मुखवटा घालून पाचोरा येथे रवाना झाले आहे.

गुलाबराव बाहुबलीच्‍या रूपात

पाचोरा येथे उद्धव ठाकरे यांची सभा सायंकाळी आहे. या सभेपुर्वी जिल्‍ह्यातील वातावरण चांगलेच तापलेले असून गुलाबराव पाटील यांचे समर्थक देखील सभेला रवाना झाल्‍याचे पहावयास मिळाले आहे. समर्थकांनी गुलाबराव पाटील यांचा मुखडा परिधान केला असून गाडीच्‍या पुढे गुलाबराव पाटील यांचे बाहुबलीच्‍या रूपातील कटआऊट लावले आहे.