जळगाव : कवयित्री बहिणाबाई चौधरी उत्तर महाराष्ट्र विद्यापीठाशी संलग्नित महाविद्यालयांत शिक्षण घेणाऱ्या विद्यार्थ्यांना कोविडच्या पार्श्‍वभूमीवर २०२१-२२ या शैक्षणिक वर्षासाठी विविध शुल्कात सवलत देण्याचा निर्णय विद्यापीठाने घेतला आहे. (jalgaon-news-Consolation-to-the-students-Concession-tuition-fees-on-the-covid-jalgaon-university)

पुणे येथील उच्च शिक्षण संचालनालय, तसेच मुंबई येथील उच्च व तंत्रशिक्षण विभागाचे उपसचिव यांच्या निर्देशान्वये हा निर्णय घेण्यात आला. यात, जिमखाना शुल्क, आपत्कालीन व्यवस्थापन शुल्क, विद्यार्थी उपक्रम शुल्क, गरीब विद्यार्थी सहाय्यता निधी, अश्‍वमेध शुल्क, स्नेहसंमेलन शुल्क, व्यक्तिमत्त्व विकास व व्यवसाय रोजगार मार्गदर्शन शुल्क पूर्णपणे माफ करण्यात आले आहे, तर ग्रंथालय शुल्क आणि प्रयोगशाळा शुल्क (विज्ञान) ५० टक्के माफ करण्याचा निर्णय विद्यापीठाने घेतला आहे.

‘त्या’ विद्यर्थ्यांचे शुल्क पूर्ण माफ

ज्या विद्यार्थ्यांचे आई-वडील, पालक कोविड-१९ च्या प्रादुर्भावामुळे मृत झाले आहेत, अशा विद्यार्थ्यांचे पदवी, पदव्युत्तर शिक्षण पूर्ण होईपर्यंतचे संपूर्ण शुल्क माफ करण्याचासुद्धा निर्णय घेण्यात आला आहे. ही सवलत २०२१-२२ या शैक्षणिक वर्षासाठी लागू असेल. या शुल्क माफीव्यतिरिक्त इतर शुल्क विद्यापीठाच्या प्रचलित नियमानुसार आकारण्यात येईल.

शुल्क भरण्यास सवलत

विद्यार्थ्यांकडे प्रलंबित असलेले शुल्क तीन हप्त्यांत भरण्याचीसुद्धा सवलत देण्यात आली असून, विद्यार्थ्यांचे शैक्षणिक नुकसान होऊ नये म्हणून विद्यार्थ्यांकडे थकीत शुल्क असल्यास परीक्षेचा अर्ज अडविण्यात येऊ नये, असेही निर्देश महाविद्यालयांना विद्यापीठाने पत्राद्वारे दिले आहेत.