जळगाव : शहरासह जिल्ह्यात कमाल तापमानात चार अंशाने वाढ झाल्याने (Tempareture) तापमान नऊ अंशांवर पोहचले. दरम्यान, येत्या १५ जानेवारीपर्यंत तापमान ९ ते ११ अंशांदरम्यानच राहील, असा अंदाज हवामान विभागाने वर्तविला आहे. (Live Marathi News)

सोमवारी (ता. ९) पासून तापमानात घट होऊन कडाक्याची थंडी जाणवत आहे. त्यापासून सरंक्षण करण्यासाठी नागरिकांनी काम असेल तर घराबाहेर पडा, गरम कपडे वापरा, असे आवाहन करण्यात आले आहे. थंडीच्या लाटेला (Cold Wave) सामोरे जाण्यासाठी राष्ट्रीय आपत्ती व्यवस्थापन प्राधिकरणाने संरक्षणाचे उपाय सुचविले आहेत.

थंडीत स्पर्श केल्यानंतर जाणीव होत नसल्यास किंवा हाताची बोटे, कानाची पाळी, नाकाचा शेंडा यांचा रंग पांढरा किंवा फिक्कट झाल्यास तत्काळ डॉक्टरांचा सल्ला घ्यावा, शरीर थंड पडणे, थंडी वाजणे, स्मृतिभ्रंश होणे, बोलताना विसंगती किंवा अडखळणे, उच्चार स्पष्ट न करता येणे, अंधारी येणे, थकवा जाणवत असल्यास तत्काळ डॉक्टरांना दाखवावे.