जळगाव : अवैधरित्या कार व रिक्षांमध्ये गॅस भरण्याचे प्रकार सर्रासपणे सुरु आहेत. यामुळे मोठ्या घटना घडल्या असताना देखील हा प्रकार सुरु असल्याचे पुन्हा एकदा समोर आले आहे. आता जामनेर शहरात अवैध पद्धतीने चारचाकी गाडीत गॅस भरण्यात येत असताना सिलेंडरचा मोठा स्फोट झाला. यामुळे परिसरात खळबळ उडाली होती. दरम्यान गॅसचा भडका उडाला; यावेळी आजूबाजूला कोणी नसल्याने सुदैवाने जीवितहानी टळली आहे. 

घरगुती गॅस सिलेंडरमधून रिक्षा व गाड्यांमध्ये गॅस भरण्याचे अवैध प्रकार सुरु आहेत. यासाठी काही ठिकाणी छुप्या पद्धतीने दुकान टाकून हा अवैध धंदा चालविला जात आहे. दरम्यान अशाच एका प्रकारामुळे जळगाव शहरात गाडीमध्ये गॅस भरताना झालेल्या स्फोटात सहा जणांचा मृत्यू झाला होता. यानंतर पोलीस प्रशासनाकडून करडी नजर असल्याने हे प्रकार बंद झाले होते. मात्र आता पुन्हा हे प्रकार सुरु झाले आहेत. 

जामनेर शहरात सिलेंडरचा स्फोट 

दरम्यान कारमध्ये सिलेंडरमधून अवैधरित्या गॅस भरण्याचे काम सुरु होते. या प्रयत्नादरम्यान मोठा अपघात घडला असून गॅस सिलेंडर अचानक स्फोट झाला. सिलेंडरचा मोठा आवाज झाल्याने परिसरात घबराटीचे वातावरण निर्माण झाले. सुदैवाने यात कोणतीही जीवितहानी झाली नसली तरी चारचाकी वाहनाचे मोठे नुकसान झाले आहे.

दुकानदार व वाहन धारकावर कारवाई 

घटनेची माहिती मिळताच जामनेर पोलिसांनी तातडीने घटनास्थळी धाव घेतली. तपासात गॅस भरण्याचे काम बेकायदेशीररीत्या सुरू असल्याचे समोर आले. यानंतर पोलिसांनी संबंधित दुकानदार आणि गॅस भरणाऱ्या वाहनधारकावर कारवाई केली. मात्र या प्रकारामुळे जामनेर शहरात अवैध गॅस भरण्याच्या व्यवसायावर गंभीर प्रश्नचिन्ह उभे राहिले असून नागरिकांनीही याविरोधात कठोर पावले उचलण्याची मागणी केली आहे.