जळगाव : विदगाव येथील एका तरुणाने रविवारी (११ मे) दुपारी दोनच्या सुमारास पुलावरून तापी नदीत (Tapi River) उडी मारून आत्महत्या केली. सुमारे तासभर शोध घेतल्यावर तरुणाचा मृतदेह मिळून आला. पुनमचंद दगडू कुंभार (वय ३५, रा. विदगाव, ता. जळगाव) असे मृत तरुणाचे नाव आहे. (Tajya Batmya)

जळगाव तालुक्‍यातील विदगावचा पूनमचंद कुंभार वीटभट्टीवर पत्नीसह मजुरी करतो. रविवारी दुपारी त्याने अचानक पुलावरून तापी नदीत उडी मारली. ग्रामस्थांनी घटनास्थळी धाव घेतली. गावातील पट्टीचे पोहणारे गुलशन नाईक, जनार्दन कोळी, कैलास झळके, अशोक कुंभार, जनार्दन कुंभार आदींनी त्याचा तासभर पाण्यात शोध घेतल्यावर त्याचा मृतदेह हाती लागला. तत्काळ ग्रामस्थांनी त्याला पोलिसांच्या उपस्थितीत शासकीय वैद्यकीय महाविद्यालय व रुग्णालयात नेले. तेथे वैद्यकीय अधिकारी डॉ. नम्रता अच्छा यांनी तपासून त्यास मृत घोषित केले.

आत्महत्येचे कारण अस्‍पष्‍ट

जळगाव (Jalgaon) तालुका पोलिसांत (Police) आकस्मिक मृत्यूची नोंद झाली आहे. मृत पूनमचंद यांच्या पश्चात पत्नी, २ मुले, आई, वडील, २ भाऊ, १ बहीण असा परिवार आहे. रुग्णालयात नातेवाईक, मित्रांनी गर्दी केली होती. पुनमचंदच्या आत्महत्येचे कारण कळू शकले नाही.