जळगाव : जळगाव शहराला गिरणा पंपिंग प्रकल्पातून पाणी पुरवठा करण्यात येत असतो. यात गिरणा पंपिंगपासून करण्यात आलेल्या जुन्या पाणीपुरवठा योजनेचे पाइप जेसीबीद्वारे काढून चोरी करण्यात येत होती. हे पाईप नेतानाच दोन जणांना रंगेहाथ पकडण्यात आले असून सहा जणांविरुद्ध गुन्हा दाखल करण्यात आला आहे. 

जळगाव शहरातील सदरचा धक्कादायक प्रकार हा गिरणा पंपिंग रस्त्यावर आर्यन पार्कसमोर भरदिवसा सुरू होता. गिरणा पंपिंग प्लांटवरून शहराला पाणीपुरवठा केला जात होता. मात्र सध्या ही पाणी योजना बंद आहे. दरम्यान गिरणा पंपिंग रस्त्यावर जेसीबीद्वारे चारी खोदून याठिकाणी टाकलेले बीड धातूचे पाइप काढण्यात येत होते. याबाबतची माहिती ठेकेदार यांनी जळगाव मनपा पाणीपुरवठा विभागाचे उपअभियंता यांना दिली. 

मनपा कराचार्यानी पाईप घेतले ताब्यात 

सदर प्रकारची लागलीच दखल घेत पाणी पुरवठा विभागाचे उपअभियंता यांनी पंप अटेंडंट कर्मचारी यांना लागलीच त्याठिकाणी पाठविले. यावेळी या कर्मचाऱ्यांना दोन जेसीबीच्या साहाय्याने जुनी पाइपलाइन खोदून बीड धातूचे पाइप काढत असताना आढळून आले. कोणतीही परवानगी न घेता पाईपलाईन काढण्यात येत असल्याचे समोर आले असून मनपा कर्मचाऱ्यांनी हे पाईप जप्त केले आहेत. 

चार जण पोलिसांच्या ताब्यात 

दरम्यान परवानगी न घेता पाईप काढण्यात येत असल्याने पोलिसात गुन्हा दाखल करण्यात आला आहे. या प्रकरणी तालुका पोलिस ठाण्यात पाच जणांविरुद्ध गुन्हा दाखल झाला. दरम्यान, या प्रकरणात चार जणांना पोलिसांनी ताब्यात घेतले आहे. पुढील तपास पोलीस करीत आहेत.