अडावद (जळगाव) : चोपडा तालुक्यातील अडावद या गावात काही अज्ञातांनी तरुणाची दगडाने व लाकडी दांड्याने मारहाण करत तरुणाची हत्या केल्याची घटना उघडकीस आली. महिनाभरात खुनाची ही तिसरी घटना असून या घटनेनंतर परिसरात भीतीचे वातावरण पसरले आहे. या प्रकरणी काही संशयितांना चौकशीसाठी पोलिसांनी काही जणांना ताब्यात घेतले आहे. 

चोपडा तालुक्यातील अडावद गावातील भगवाननगरमधील मोकळ्या जागेवर तरुणाचा खून झाल्याची घटना सकाळी उघडकीस आली. पोलिसांना घटनेची माहिती कळताच सहाय्यक पोलिस निरीक्षक प्रमोद वाघ, उपनिरीक्षक राजू थोरात यांनी सहकाऱ्यांसह घटनास्थळी धाव घेतली. डोक्यावर दगडाने वर केले असल्याने तरुणाची ओळख पटत नव्हती. मात्र पोलिसांच्या तपासात मृत हा गावातीलच लोखंडेनगरातील बापू हरी महाजन (वय ३५) असल्याचे निष्पन्न झाले. त्याच्या डोक्यावर, तसेच तोंडावर गंभीर जखमेच्या खुणा होत्या. 

खुनाचा तपास करण्यासाठी श्वानपथकाला पाचारण केले. श्वानाने मारेकऱ्यांचा माग दाखविला असता त्यादृष्टीने पोलिसांनी तपास सुरू केला आहे. दरम्यान काही जणांवर संशय असल्याने पोलिसांनी काही संशयितांना चौकशीसाठी ताब्यात घेतले आहे.