जळगाव : विधानसभा निवडणुकीसाठी मतदानाची प्रक्रिया काल पार पडली. यासाठी कर्मचाऱ्यांची नियुक्ती करण्यात आली होती. त्यानुसार मतदान केंद्रावरील आपली ड्युटी संपल्यानंतर घरी जाणाऱ्या शिक्षकाचा अपघातात मृत्यू झाला. या घटनेमुळे खळबळ उडाली आहे. 

चोपडा- शिरपूर मार्गावर सदरची घटना रात्रीच्या (Chopda) सुमारास घडली. लक्ष्मीकांत वासुदेव पाटील उपशिक्षक (बी.एल.ओ.) अनवर्दे -बुधगांव (वय ४९, रा. बभळाज ता. शिरपूर) असे मृत कर्मचाऱ्यांचे नाव आहे. विधानसभा निवडणुकीसाठी राज्यात काल मतदानाची प्रक्रिया पार पडली. यासाठी शिक्षक व प्रशासनातील कर्मचाऱ्यांची मतदान केंद्रांवर ड्युटी लावण्यात आली होती. त्यानुसार लक्ष्मीकांत पाटील यांची अनवर्दे -बुधगांव येथे बीएलओ म्हणून नियुक्ती करण्यात आली होती.  

घरी परतताना अपघात दिवसभर मतदान केंद्रावर कर्तव्य बजावून झाल्यानंतर सर्व साहित्य रवाना केल्यानंतर लक्ष्मीकांत पाटील हे रात्री (बभळाज ता. शिरपूर) येथे घरी जाण्यासाठी निघाले. याच दरम्यान त्यांच्या मोटरसायकलचा चोपडा- शिरपूर रस्त्यावरील गलंगी चौकात (Accident) अपघात होऊन त्यात त्यांचा मृत्यू झाला. दुर्दैवी घटनेसंदर्भात जिल्हा निवडणूक अधिकारी तथा जिल्हाधिकारी आयुष प्रसाद आणि जिल्हा परिषदेचे मुख्य कार्यकारी अधिकारी श्री. अंकित यांनी या घटनेबद्दल शोक व्यक्त केला आहे.