यावल (जळगाव) : घरातून बाहेर जात असल्याचे सांगून दुचाकी घेऊन निघाला. यानंतर तापी नदीच्या पुलावर आला असता दुचाकी उभी करून तरुणाने पुलावरून तापी नदीत उडी घेतली. हि घटना भुसावळ शहरालगत असलेल्या तापी नदीच्या पुलावर घडली आहे. 

यावल (Yawal) शहरातील बोरावल गेट परिसरातील लखन संजय कोळी (वय २८) असे या तरुणाचे नाव आहे. लखन हा आई-वडील, पत्नी व दोन मुलांसह राहत होता. लखन कोळी हा मंगळवारी दुपारी साडेतीनला मोटरसायकल घेऊन भुसावळला (Bhusawal) गेला. यानंतर त्याने भुसावळ जवळील तापी नदीच्या पुलावर मोटरसायकल लावली व तेथून नदीपात्रात उडी घेतली. हा प्रकार नागरिकांच्या निदर्शनास आल्यानंतर त्यांनी तातडीने फैजपूर पोलिसांना माहिती दिली. 

घटनेची माहिती मिळताच फैजपूर पोलिसांनी घटनास्थळ गाठले. सदर तरुण यावल शहरातील बोरावल गेट भागातील असल्याचे समजतात शहरातील अनेक नागरिकांनी नदीपात्राकडे धाव घेतली. रात्री उशिरापर्यंत त्याचा शोध नदीत सुरू होता. मात्र तो आढळून आला नाही. आज सकाळी पुन्हा नदीपात्रात त्याचा शोध घेण्यास सुरवात करण्यात आली.