राज्यातील अनेक जिल्ह्यांना जुलै महिन्यात पावसाने झोडपून काढलं आहे. काही भागातील पूर अद्यापही ओसरलेला नसताना पुन्हा हवामान खात्याने पावसाचा इशारा दिला आहे. राज्यात पुढील दोन दिवस पावसाचं जोर वाढणार असून काही ठिकाणी अतिवृष्टीची शक्यता आहे. त्यामुळे रेड अलर्ट जारी करण्यात आला आहे.

हवामान खात्याने संपूर्ण कोकणासाठी ऑरेंज अलर्ट जारी देण्यात आला आहे. तर मुंबई, ठाण्यात आज मुसळधार पावसाचा इशारा देण्यात आला आहे. पुणे आणि साताऱ्यातील घाट परिसरात काही भागात अतिवृष्टीची शक्यता आहे. त्यामुळे साताऱ्यातील घाट परिसरासाठी रेड अलर्ट जारी करण्यात आला आहे. विदर्भात देखील सर्वत्र विजांच्या कडकडाटासह पावसाचा अंदाज आहे.

गेल्या आठवड्यात मुसळधार पावसामुळे पुणेकरांची अक्षरश: दाणादान उडाली. मुळा-मुठा नद्यांचं पाणी नागरी वस्त्यांमध्ये पाणी शिरलं होतं. खडकवासला आणि इतर धरणांमधून पाण्याचा विसर्ग थोडा कमी झाला होता. आता पुन्हा मुसळधार पावासाचा इशारा देण्यात आला आहे. तर साताऱ्यातील कोयणा आणि कृष्णा नद्यांच्या पाणी पातळीत प्रचंड वाढ झाल्यामुळे पूरस्थिती निर्माण झाली होती. आता घाट माथ्यावर पुन्हा अतिवृष्टीची शक्यता आहे. त्यामुळे हवामान खात्याने रेड अलर्ट दिला आहे.

दरम्यान मुंबई, नवी मुंबई आणि उपनगरांमध्ये पावसाने पुन्हा दमदा हजेरी लावली आहे. मुंबई, ठाण्यात आज मुसळधार पावसाचा इशारा देण्यात आला आहे. सांताक्रुज, पार्ले, अंधेरी, जोगेश्वरी, गोरेगाव, मालाड, कांदिवली, बोरिवली आणि दहिसर परिसरात सध्या मुसळधार पावसाला सुरुवात झाली आहे. परंतु आज अचानक आलेल्या पावसाने पुन्हा एकदा नागरिकांची मोठी दाणादाण उडाली आहे.