राज्यात गेले दोन दिवस ढगाळ वातवरण पाहायला मिळालं तरीही गारठा कायम होता. तसेच मुंबईसह अनेक भागात हलक्या स्वरूपाचा पाऊस देखील बरसला. आज वातावरणात गारठा असून तापमानात चढ -उतार असल्याचा अंदाज हवामान विभागाने वर्तवला आहे. डिसेंबरमध्ये राज्यात थंडीचा कडाका अधिक असल्याने निफाड येथे २० डिसेंबर २०२५ रोजी यंदाच्या हिवाळ्यातील नीचांकी ४.५ तापमान नोंदले गेले होते. दरम्यान हवामान खात्याने काही जिल्ह्यांना थंडीच्या लाटेचा यलो अलर्ट दिला आहे.

काल राज्यात ढगाळ वातावरण पाहायला मिळालं. या ढगाळ वातावरणाचा परिणाम थंडीवर झाला. आज नाशिक, निफाड, मुंबई, पुणे, मराठवाडा, विदर्भात थंडीचा कडाका वाढला आहे. ठिकठिकाणी शेकोट्या पेटलेल्या दिसत आहेत. हवामान खात्याच्या अंदाजानुसार तापमानात चढ उतार कायम राहणार आहे. अनेक ठिकाणी पारा १० अंशाच्या खाली उतरला आहे.

तापमानात होणाऱ्या सततच्या बदलामुळे नागरिक हैराण झाले आहेत. तर दुसरीकडे थंडीचा परिणाम शेतकऱ्यांच्या हंगामी पिकांवर झाला आहे. २०२५ हे वर्ष १९०१ पासूनचे आठवे उष्ण वर्ष ठरले असले तरी, या वर्षातील शेवटचे तीन महिने तुलनेने थंड असल्याचे दिसून आले आहे. यातही नोव्हेंबर आणि डिसेंबर या दोन महिन्यांत थंडी अधिकच वाढल्याचे स्पष्ट होत आहे.

वर्षभरात चार चक्रीवादळांची निर्मिती

२०२५ या वर्षात शक्ती, मोंथा, सेन्यार आणि डिटवाह ही चार चक्रीवादळे तयार झाली. यातील दोन चक्रीवादळे तीव्र झाली. या सर्व प्रणाली मॉन्सूनोत्तर हंगामात (ऑक्टोबर ते डिसेंबर) विकसित झाल्या. चारपैकी मोंथा, सेन्यार आणि डिटवाह ही तीन चक्रीवादळे बंगालच्या उपसागरात, तर शक्ती हे चक्रीवादळ अरबी समुद्रात निर्माण झाले. वर्षभरात उत्तर हिंदी महासागरात एकूण ११ तीव्र कमी दाब (डिप्रेशन) प्रणाली तयार झाल्या.