भरत मोहळकर, साम टीव्ही, प्रतिनिधी

विधानसभेपूर्वी महायुती सरकारने आणलेल्या लाडक्या बहीण योजनेला मोठा प्रतिसाद मिळतोय. या योजनेचा पुण्यात शुभारंभ झाला. तर या कार्यक्रमाला उपस्थित राहण्यासाठी सरकार लाडक्या बहीणींना धमक्या देत असल्याचा आरोप सुप्रिया सुळेंनी केलाय. तर क्रांतीकारी योजनेमुळे विरोधकांना नैराश्य आल्याचा पलटवार सुनील तटकरेंनी केलाय.

लाडकी बहीण योजनेला मिळणारा प्रतिसाद पाहून काँग्रेसने कर्नाटकच्या धर्तीवर राज्यात गृहलक्ष्मी योजना सुरु करून योजनेचे पैसे दुप्पट करणार असल्याचं जाहीर केलं. तर आता काँग्रेसपाठोपाठ ठाकरे गटानेही काँग्रेसची री ओढत सरकार आल्यास लाडकी बहीण योजना बंद न करता महिन्याला 3 हजार रुपये देण्याची घोषणा केलीय.

राज्यावर 7 लाख कोटींपेक्षा जास्त कर्ज आहे. त्यातच लाडकी बहीण योजनेमुळे राज्याची अर्थव्यवस्था आणखी खोलात जाईल, अशी टीका विरोधी पक्षांनी वारंवार केली होती. मात्र या योजनेला मिळणा-या प्रतिसादामुळे विरोधकांनीही चांगलाच धसका घेतलाय.

त्यामुळे रिकाम्या तिजोरीकडे दुर्लक्ष करत विरोधकांनीही या योजनेत दुप्पट वाढ करण्याचं जाहीर केलंय. सरकारला कडकी असली तरी लाडक्या बहिणीची विरोधकांना धडकी भरलीय एवढं मात्र नक्की...