हिंगोली : हिंगोलीच्या वसमत तालुक्यातील मुडी गावाच्या परिसरात कॅनॉलमध्ये गावातील काही तरुण पोहण्यासाठी गेले होते. दरम्यान पोहण्यासाठी कॅनॉलमध्ये उडी मारली मात्र सदर तरुण वर आलाच नाही. कॅनॉलमध्ये पाणी सोडण्यात आल्याने पाण्याचा प्रवाह अधिक असल्याने या प्रवाहासोबत तरुण वाहून गेल्याने बेपत्ता झाला. दरम्यान शोध मोहिमेनंतर तरुणाचा मृतदेह आढळून आला आहे. 

हिंगोलीच्या वसमत तालुक्यातील मुडी गावापासून पूर्णा नदीचा कॅनॉल गेलेला आहे. याच कॅनॉलमध्ये तरुण वाहून गेल्याची घटना घडली आहे. चंडगव्हाण येथील अभय सूर्यवंशी (वय १९) असे या युवकाचे नाव आहे. दरम्यान धरणातील पाणी पूर्णा नदीत सोडल्याने कॅनॉलमध्ये पाण्याचा प्रवाह वाढला आहे. दरम्यान शनिवारी दुपारी अभय सूर्यवंशी हा कॅनॉलमध्ये मित्रांसोबत पोहण्यासाठी या परिसरात गेला होता. 

सोबत असलेल्या सर्व मित्रांसोबत अभयने देखील कॅनलमध्ये पोहण्यासाठी उडी घेतली. मात्र बाकीचे सर्व मित्र बाहेर निघाले. अभय हा पाण्यात खालीच राहिला व अचानक बेपत्ता झाला होता. सोबतच्या मित्रांनी त्याचा शोध घेतला मात्र तो सापडून आला नाही. यामुळे घटनेची माहिती गावात देण्यात आली. यानंतर पोलिसांना घटनेची माहिती दिल्यानंतर जीवरक्षक दल व स्थानिक नागरिकांच्या मदतीने अभयचा शोध घेण्यास सुरवात करण्यात आली. 

२४ तासानंतर सापडला मृतदेह 

दरम्यान या घटनेनंतर वाहून गेलेल्या अभय सूर्यवंशीचे कुटुंब देखील काळजीत पडले. चंदगव्हाण येथील ग्रामस्थांनी या परिसरात तळ ठोकत पोलीस व जीवरक्षक दलाच्या जवानांसोबत अभयचा शोध घेणे सुरू केले आहे. मागील २४ तासापासून पोलीस प्रशासन जीवरक्षक दलाचे जवान व स्थानिक ग्रामस्थ अभय सूर्यवंशी याचा शोध घेत असून आज सकाळच्या सुमारास अभयचा मृतदेह सापडून आला आहे.