हिंगोली : शेतमाल विक्री करणाऱ्या शेतकऱ्यांची व्यापाऱ्यांकडून फसवणुकीचे अनेक प्रकार समोर आले आहेत. असाच प्रकार हिंगोलीत समोर आला आहे. मापात पाप करून व्यापारी शेतकऱ्यांची फसवणूक करत आहेत. हिंगोलीच्या सेनगाव तालुक्यातील वटकळी गावातील हा गंभीर प्रकार घडला आहे. १४ किलो हळदी मागे तब्बल चार किलो हळद मापात पाप करून व्यापारी चोरी करत असल्याचे पुढे आल्याने शेतकऱ्यांमध्ये खळबळ उडाली आहे. 

हिंगोली जिल्ह्यात सध्या शेतकऱ्यांच्या हळद काढणीचा हंगाम सुरू झाला आहे. हळदीच्या शेतात कोच्या नावाची हळद ही महागडी विक्री होते. या कोचा हळदीचा भाव प्रति किलो २३० रुपये सुरू आहे. हीच हळद खरेदी करण्यासाठी दुचाकीवर अनेक व्यापारी शेतकऱ्याच्या दारावर येत आहेत. मात्र दारावर हळद खरेदीसाठी येणाऱ्या व्यापाऱ्यांकडून शेतकऱ्यांची फसवणूक करण्यात येत असल्याचा प्रकार समोर आला आहे. 

मोजमापात शेतकऱ्याला आला संशय 

हिंगोली जिल्ह्यातील वटकळी गावातील शेतकरी सोपान डाखोरे यांच्या शेतात उत्पादित झालेली महागडी कोचा हळद गावात आलेल्या एका व्यापाऱ्याने खरेदी केली. मात्र ही हळद खरेदी करताना चक्क १४ किलो हळद ११ किलो असल्याचे या व्यापाऱ्याने शेतकऱ्याला सांगितले. त्याचे दाम देखील दिले. मात्र या व्यापाऱ्याच्या मोजमाप काट्याचा संशय आल्याने शेतकरी सोपान डाखोरे यांनी दुसऱ्या ठिकाणी या हळदीचे माप केले. 

तीन किलोची आढळली तफावत 

तिथे मात्र तब्बल तीन किलोची तफावत आढळली, तीन किलो हळदीचे ७०० रुपये व्यापारी मापात पाप करून लुटत असल्याचे शेतकऱ्याच्या निदर्शनास आले. त्यानंतर शेतकरी डाखोरे चांगलेच संतप्त झाले. त्यांनी गावातील सरपंचासह पोलीस पाटील यांना बोलावत या व्यापाऱ्याला धडा शिकवावा अशी मागणी केली. या सगळ्या प्रकारानंतर व्यापाऱ्याने चूक झाली; असे म्हणत प्रकरण मिटून टाका अशी विनंती केली आणि त्यानंतर गावातून पळ काढला.