हिंगोली : हिंगोली जिल्ह्यात शासकीय वैद्यकीय महाविद्यालय सुरू करण्यासाठी केंद्रीय आरोग्य मंत्रालयाने हिरवा कंदील दिला आहे. गतवर्षी मान्यता मिळाल्यानंतर आता हे महाविद्यालय सुरु करण्याच्या हालचाली सुरु झाल्या असून यात शंभर विद्यार्थ्यांना प्रवेश मिळणार आहे. 

राज्य सरकारने हिंगोलीत (Hingoli) वैद्यकीय महाविद्यालय सुरू करण्यासाठी मागील वर्षीच मान्यता दिली होती. मात्र प्रत्यक्षात शासकीय वैद्यकीय महाविद्यालयात विद्यार्थ्यांना प्रवेश देण्यासाठी प्रक्रिया सुरू करण्यात आली नव्हती. यामुळे महाविद्यालय सुरु करून यात प्रत्यक्षात विद्यार्थ्यांना प्रवेश मिळावा यासाठी हिंगोलीकरांनी सरकारच्या विरोधात आंदोलन करत पाठपुरावा केला होता. त्यानंतर मात्र आता वैद्यकीय महाविद्यालय सुरु करण्याच्या हालचाली सुरु झाल्या आहेत. 

१०० विद्यार्थ्यांना प्रवेश 

लवकरच हिंगोली मध्ये वैद्यकीय महाविद्यालय सुरू करण्यात येणार आहे. महाविद्यातील प्रवेश प्रक्रिया यंदापासून सुरु करण्यात येणार असून यावर्षीपासून शंभर (Student) विद्यार्थ्यांना वैद्यकीय महाविद्यालयात प्रवेश देण्यात येणार आहे. त्यामुळे वैद्यकीय क्षेत्रात शिक्षण घेणाऱ्या विद्यार्थ्यांना मोठा दिलासा मिळाला आहे.